Anna Kristjánsdóttir fagnar því í dag að eitt ár er liðið síðan hún flutti í sólina til Tenerife. Anna virðist alls ekki sjá eftir því að hafa flutt til Paradísar, eins og hún kallar þessa stærstu og fjölmennustu eyju Kanaríeyja.
„Í kvöld verður komið eitt ár síðan ég kom til Paradísar. Eins og gefur að skilja hefi ég verið mjög umhverfisvæn þetta ár,“ segir hún í færslu á Facebook og nefnir að hún hafi á þessum tíma ekki stigið upp í þotu, ekki átt bíl næstum jafnlengi en notið sólar og sumars allan þennan tíma.
Anna er komin með græna kortið sem gefur henni rétt til varanlegrar búsetu og það virðist ekkert fararsnið vera á Önnu, síður en svo.
„Eins og gefur að skilja á orðum mínum er ég ekkert á leiðinni til Íslands á næstunni, enda lifi ég eins og blóm í eggi,“ segir hún en Anna skrifar daglega pistla á Facebook um lífið á Tenerife sem þykja býsna skemmtilegir aflestrar.
