„Nú berast fréttir af því að safn í Reykjavík ætli að sýna meinta afsteypu af getnaðarlim Jimi Hendrix í sérsmíðuðum glerkassa. Þetta finnst mér óskiljanlegur gjörningur,“ skrifar Anton Helgi Jónsson, skáld, á Facebook síðu sína.
Fréttablaðið greindi frá því í gær að afsteypa af getnaðarlimi rokkarans Jimi Hendrix hafi verið afhjúpuð á Hinu íslenzka reðasafni í miðbæ Reykjavíkur. Um er að ræða gjöf frá listakonunni Cynthiu Albritton en hún gerði afsteypuna árið 1968 en Hendrix lést tveimur árum síðar.
Antoni finnst minningu Hendrix lítill sómi sýndur með þessu. „Við fyrsta tækifæri mun ég vekja upp í mér miðbæjarvillinginn og gera mér ferð á safnið með góðan slaghamar og mölva bæði glerkassann og afsteypuna,“ skrifa hann.
Hann minnist þess að hafa heyrt fyrst í Hendrix í glymskratta á Fríkirkjuvegi 11 en þar stóð félagsmiðstöð. „Það var ekki bara gítarleikurinn sem heillaði, röddin var einstök og hún mun hljóma innra með mér svo lengri sem ég lifi,“ skrifar Anton.
„Ég hefði kannski skilið það betur ef eitthvert safn hefði viljað sýna afsteypur af höndum gítarleikarans eða jafnvel tönnum hans. Samkvæmt fréttaskýringaþætti í útvarpi allra landsmanna á að sýna afsteypuna svo litlir karlar geti komið og öðlast sjálfstraust við að bera sinn skaufa saman við sýningargripinn,“ skrifar Anton, ósáttur um þá vanvirðingu sem Hendrix er sýnd að hans mati.
