Annþór Kristján Karlsson er gestur í nýjasta hlaðvarpsþætti Sölva Tryggvasonar. Í viðtalinu fara þeir Sölvi um víðan völl en Annþór er líklega best þekktur fyrir að hafa verið einn harðsvíraðasti glæpamaður Íslands á árum áður. Annþór hefur snúið blaðinu við og er breyttur maður.
„Ég á mína forsögu og það er fullkomlega eðlilegt að samfélagið taki mann ekki í sátt strax, jafnvel þó að maður sé búinn að afplána dóm. Ég er að fara að útskrifast úr byggingarfræði úr Háskóla Reykjavíkur um áramótin og er búinn að vera réttu megin við lögin í talsverðan tíma, en ég skil það vel að það séu ekki allir tilbúnir að taka mann í sátt,“ segir Annþór meðal annars.
Hann segir að heilt yfir hafi fólk tekið honum vel og hugsi almennt að batnandi fólki sé best að lifa.
„En ég er búinn að gera allt of mikið af mér til að geta bætt upp fyrir það allt. Svo virkar þetta líka þannig að minni manns verður valfrjálst þegar maður er í svona miklu rugli og ég man ekki nema hluta af því sem ég hef gert. En ég hef brotið á gríðarlega mörgum og veit að í mörgum tilvikum dugar ekki að biðjast afsökunar. En ég vona að það sem ég er að gera í dag muni smátt og smátt með tímanum gera það að verkum að ég verði þekktur fyrir annað en bara glæpi.”
