Annað COVID-19 smit er komið upp í íslenska Eurovision-hópnum og þar með er ljóst að afar litlar líkur eru á því að Daði og gagnamagnið stigi á svið á seinna undanúrslitakvöldinu annað kvöld. Verður að öllum líkindum notast við upptöku.
RÚV greinir frá þessu.
Í fréttinni kemur fram að þetta hafi komið í ljós þegar átta einstaklingar úr hópnum voru skimaðir fyrir veirunni í morgun. „Þetta er mikið högg,“ hefur RÚV eftir Rúnari Frey Gíslasyni, fjölmiðlafulltrúa íslenska hópsins.
Tveir í íslenska hópnum eru smitaðir en fyrra smitið kom upp um liðna helgi.
