Anna veit hvern hún ætlar að kjósa á Bessa­staði og af­þakkar allt skít­kast

Anna Kristjáns­dóttir, pistla­höfundur og Tenerife-búi, segist vera búin að gera upp hug sinn fyrir komandi for­seta­kosningar í vor.

Eins og staðan er núna virðist bar­áttan standa á milli fimm ein­stak­linga: Guðna Th. Jóhannes­sonar, Axels Péturs Axels­sonar, Arn­gríms Frið­riks Pálma­sonar, Guð­mundar Frankíns Jóns­sonar og Kristjáns Arnar Elías­sonar.

Anna, sem er þekkt fyrir skemmti­leg skrif á Facebook, sagði frá því um helgina að henni hafi borist nokkur skila­boð að undan­förnu þar sem reynt er að hæðast að per­sónu for­seta Ís­lands og niður­lægja hann á annan hátt.

„Vegna þessa lýsi ég því yfir að ég styð Guðna Th. Jóhannes­son til á­fram­haldandi starfa sem for­seti Ís­lands og er sú á­kvörðun endan­leg,“ segir Anna sem sendir þeim tóninn sem hafa at­huga­semdir við þetta eða ætla að halda á­fram að senda henni nei­kvæð skila­boð í garð Guðna. Gefur hún leið­beiningar hvernig fólk getur endað vin­skapinn á Face­book.

„Með því að smella á þann mögu­leika losnið þið við mig. Þið getið svo bætt um betur með því að velja Settings (stillingar) og Blocking (Úti­lokanir) og þar losnið þið endan­lega við bullið í mér. En ég elska ykkur samt. Svo er bara að vona að ræðis­maður komi hingað til Tenerife svo hægt sé að greiða at­kvæði utan­kjör­staðar í tæka tíð fyrir for­seta­kosningarnar 27. júní 2020.“