Anna rifjar upp hræði­legt bíl­slys úr æsku: „Kastaðist út úr bílnum á­­samt bræðrum mínum“

Anna Kristjáns­dóttir, íbúi á Tenerife og lands­þekktur pistla­höfundar, rifjar upp al­var­legt bíl­slys úr æsku sinni í pistli dagsins.

„Ég lenti einu sinni í bíl­­slysi. Ég var átta ára, sat í bíl sem valt á Vestur­lands­veginum skammt frá Blika­­stöðum og kastaðist út úr bílnum á­­samt bræðrum mínum sem sátu í fram­­sætinu, en næst­elsti bróðir minn ók bílnum. Þegar bíl­belti voru lög­­leidd á Ís­landi, fyrst árið 1969 fannst mér það al­­gjör ó­­þarfi. Ég hefði kastast út úr bíl í veltu árið 1960 og sloppið lifandi,“ skrifar Anna.

„Það má svo deila um það hvort ég sé svona klikkuð eftir slysið sem raun ber vitni, enda var hausinn á mér tvö­faldur dagana á eftir, en engin mynd var tekin af hausnum, einungis látin hafa kalda bakstra næstu dagana á eftir. Þá vitið þið af hverju ég er eins og ég er,“ bætir hún við.

Á­stæðan fyrir því að hún rifjar þetta er út af því hún er að fara með „Mjall­hvíti sína“ í skoðun en Anna hefur nefnt bíl sinn Mjall­hvít.

„Sam­­kvæmt skoðunar­miðanum í fram­rúðunni þarf ég að mæta með hana í mars. Allt í góðu með það. Allur búnaður virkar vel og hún er hrein og fín. Þó er tvennt sem hrjáir mig. Það hefur flysjast lítið stykki úr öðru aftur­­­ljósinu, þó ekki verra en svo að það ætti ekki að hafa nein á­hrif á aksturinn né skoðunina. Hitt er verra. Bíl­beltið bíl­­stjóra­­megin virkar ekki nógu vel. Ég þarf að gera fleiri til­­raunir til að koma því utan um mig og þetta fer sí­­fellt versnandi. Þetta er þó ekki vegna ofur­­­vaxtar bíl­­stýrunnar auk þess sem ég missti þrjú kíló í veikindum mínum um daginn,“ skrifar Anna.

„Bíl­belti á að vera í lagi og ég er löngu komin af þeirri skoðun að þau geri ekkert gagn því ég veit betur. Þess vegna vil ég hafa þau í lagi. Ég sendi fyrir­­­spurn. Hvað kostar nýtt aftur­­­ljós og nýtt öryggis­belti? Ha, 125 þúsund ís­­lenskar? Jæja, líf mitt er meira virði en 125 þúsund krónur og svo er ís­­lenska örkrónan í frjálsu falli að venju. Vil hafa hvoru­tveggja í lagi. Bíl­beltin eru nokkuð skemmti­­leg í Mercedes Benz. Ef ég þarf að snögg­hemla á hrað­brautinni, strekkist á þeim og þannig minnkar höggið ef eitt­hvað gerist. Senni­­lega er það sá búnaður sem er að byrja að gefa sig.“

„Mér varð á að nefna verðið á vara­hlutunum við einn ná­grannann og honum fannst þetta mikið. Þetta er bara jafn­­mikið og bíllinn minn allur, sagði hann og svo hlógum við. Seat ná­grannans er líka gömul drusla og sjálf get ég ekki verið þekkt fyrir að aka á gamlli druslu á flug­­völlinn næst þegar ég fer til Ís­lands. Eins gott að ég láti rigna upp í nefið á mér alla leiðina úr því ég er loksins búin að taka á­­kvörðun um að heilsa upp á fjöl­­skylduna og fé­lagana í sumar þegar snjóa leysir, þ.e. ef hann leysir ein­hvern­­tímann. Upp með veskið!“ skrifar Anna að lokum.

Hún birtir síðan mynd af bílnum sem má sjá hér að neðan.