Anna Kristjánsdóttir íbúi á Tenerife leiðréttir algengan misskilnings í kringum sölu Símans á Mílu í nýjum pistli frá Paradís.
„Ramakveinið er byrjað aftur. Kapítalistarnir ætla að sölsa undir sig eignir Símans öðru sinni, lífeyrissjóðirnir og smáhluthafarnir sitja uppi með sárt ennið og við lífeyristakarnir fáum skellinn.Höfum samt eitt í huga. Það eru allt aðrir eigendur að Símanum í dag en eignuðust hann í einkavæðingarbrjálæðinu eftir síðustu aldamót og gleymdu að borga andvirði Símans til ríkisins. Eigendur Símans í dag eru lífeyrissjóðirnir að stærstum hluta og svo fáeinir minni fjárfestar sem ætluðu sér að græða á hlutabréfamarkaði samanber kennitöluna sem er frá 2007,“ skrifar Anna.
„Fyrir nokkru síðan gaf Síminn út fréttatilkynningu þess efnis að búið væri að selja grunnlínunetið Mílu og til stæði eftir ákvörðun hluthafafundar að skila andvirði sölunnar til hluthafa. Hófu þá margir að kvarta yfir mannvonsku Símans og eru sumir enn að fáeinum dögum fyrir hluthafafundinn.“
„Sjálf hefi ég verið í viðskiptum við Símann í áratugi upphaflega frá því um 1975 er ég fékk síma, en reyndar miklu fyrr sem frímerkjasafnari og átti góð viðskipti við Póst og síma á sjöunda áratug síðustu aldar og fram á þennan dag. Eftir flutning minn til Íslands árið 1996 hefur Síminn verið minn helsti fjarskiptaaðili, með síma, farsíma og net og er svo enn í dag og stendur ekki til að breyta því þótt ég sé vissulega með viðskipti við tvö spænsk fjarskiptafyrirtæki auk Símans, Orange, en Movistar hvað Mjallhvíti mína snertir.
Ég á fáein hlutabréf í Símanum og hefi átt í nokkur ár og þau hafa lítið gefið af sér, þó eitthvað. Svo var Míla seld og sú tillaga lögð fyrir hluthafafund að greiða megnið af söluandvirðinu til hluthafa, en um leið að fækka hlutum í félaginu úr 7,3 milljörðum hluta í 4,4 milljarða hluta,“ skrifar Anna.
„Vissulega fæ ég nokkrar krónur inn á bankareikninginn minn verði tillaga til hluthafafundar samþykkt, en um leið mun hlutur minn í Símanum rýrna sem því nemur, enda má segja að Síminn sé 40% verðminni eftir söluna á Mílu. Verði tillagan samþykkt sem ég efa ekki að verði, þá verður verðmæti Símans lækkað sem er eðlilegt þegar 40% af andvirði hans hafa verið seld. Hlutabréfaeign mín í Símanum mun minnka um 40%, en mismunurinn verður greiddur út sem "arður," heldur Anna áfram.
„Það myndi eitthvað heyrast í samkeppnisfyrirtækjunum, Voðafón, Nóva og fleirum og þá helst Samkeppniseftirlitinu ef Síminn tæki þá ákvörðun að lækka gjöld viðskiptavinanna sem þessu nemur á kostnað hluthafanna í stað þess að greiða söluandvirðið út sem arð. Því er þetta mjög eðlileg ráðstöfun og ég mun ekki græða mikið ef nokkuð vegna eignaraðildar minnar að fyrirtæki sem hefur rýrnað í verði um 40%. Lífeyrissjóðirnir munu heldur ekki græða mikið né tapa á þessum gjörningi. Það er einfaldlega verið að breyta hlutabréfum í peninga, rétt eins og ég breytti peningum í hlutabréf með kaupum á hutabréfum í Símanum á sínum tíma.“
„Vildi bara leiðrétta algengan misskilning.Er ekki annars gott vetrarveður á Íslandi?“ skrifar Anna að lokum.
