„Ég hugsa með skelfingu til þess sem hefði gerst ef hann hefði fallið á hliðina og síðan rennt beint undir bílinn hjá mér,“ segir Anna Kristjánsdóttir. Segja má að snör viðbrögð Önnu hafi forðað ungum manni frá því að slasast illa á Tenerife í gær.
Anna segir frá þessu í færslu á Facebook-síðu sinni. Anna keypti sér á dögunum forláta blæjubíl og ákvað hún að nýta tækifærið og skeppa upp til El Teide, en Teide er hæsta fjall Spánar og raunar eitt af hæstu eldfjöllum heims.
Með Önnu í för voru tvær vinkonur og ætluðu þær að njóta veðurblíðunnar og náttúrufegurðarinnar í nágrenni fjallsins.
„Það eru margar blindbeygjur á leiðinni upp í hálendið og því ók ég mjög gætilega og þar sem við nálguðumst eina blindbeygjuna á aðeins 40 km hraða kom skyndilega mótorhjól fyrir blindbeygjuna á nokkurri ferð og á vitlausri akrein og stefndi beint á mig,“ segir Anna sem snarnegldi niður.
„Strákurinn á mótorhjólinu fipaðist og missti næstum stjórn á hjólinu, en náði sem betur fer stjórninni á því aftur og rétt náði að komast framhjá kyrrstæðri mér, en skelfing var erfitt að sjá hann sveiflast á hjólinu áður en hann náði stjórn á aðstæðum. Ég hugsa með skelfingu til þess sem hefði gerst ef hann hefði fallið á hliðina og síðan rennt beint undir bílinn hjá mér.
Eins gott að ég stoppaði strax því annars hefði slys ekki verið umflúið,“ segir Anna sem kveðst einnig vera þakklát fyrir það að hafa ekki verið á meiri ferð en raun ber vitni.
