„Við krefjumst þess að lögum verði breytt á þann máta að skilborðsbundin refsing eigi ekki við þegar um jafn alvarlegt brot og nauðgun er að ræða.“
Þetta segir Anna Bentína Hermansen, ráðgjafi hjá Stígamótum, sem hefur sett af stað undirskriftasöfnun þar sem hvatt er til þess að þyngri refsingar séu teknar upp í nauðgunarmálum hér á landi.
Tilefnið er dómur sem féll þann 30. nóvember síðastliðinn þegar Jón Páll Eyjólfsson, fyrrverandi leikhússtjóri Leikfélags Akureyrar, var dæmdur í tveggja og hálfs árs skilorðsbundið fangelsi fyrir nauðgun. Brotið átti sér stað fyrir tólf árum.
„Skilorðsbundinn dómur þýðir að sakborningurinn sleppur alfarið við fangelsisvist, þrátt fyrir að hafa verið fundinn sekur um næst alvarlegasta brotið í mannlegu samfélagi á eftir morði,“ segir Anna Bentína á vefsíðunni Change.org þar sem finna má undirskriftasöfnunina.
Bent er á að á Norðurlöndum, til dæmis í Svíþjóð, sé ólöglegt dæma fólk til vægrar refsingar á borð við skilorð, ef það fremur alvarleg brot gegn lífi og limum annarra.
„Í brotaflokkum á borð við nauðgun, morð og morðtilraun, þar sem lágmarksrefsingin er 1 ár eða meira, er ólöglegt að dæma hinn seka ekki til fangavistar. Sömu lög þyrfti að taka upp á Íslandi.“
Segir Anna að það hljóti að vera á skjön við réttlætiskennd almennings að fólk geti framið hrottalegar nauðganir og að þeir örfáu gerendur sem sakfelldir eru fyrir dómstólum þurfi ekki að verja einni mínútu bakvið lás og slá.
„Við krefjumst þess að lögum verði breytt á þann máta að skilborðsbundin refsing eigi ekki við þegar um jafn alvarlegt brot og nauðgun er að ræða. Það er löngu tímabært að refsingar fyrir grófustu glæpina endurspegli afleiðingarnar fyrir þolendur – og samfélagið í heild.“
Hægt er að leggja undirskriftasöfnuninni lið hér.
