„Ég er ekki sátt. Um daginn laug ég því í viðtali við síðdegisútvarp Rásar 2 að von væri á tveimur flugvélaförmum af Íslendingum til Paradísar dagana fyrir jól. Ég segi laug, því ég hafði vart sleppt orðinu er Vita eða Icelandair aflýstu öðru fluginu,“ segir Anna Kristjánsdóttir, íbúi á Tenerife.
Smitum hefur fjölgað heldur að undanförnu á Tenerife og er á barmi þriðju bylgjunnar að sögn spænskra fjölmiðla. 209 smit greindust í gær og í það heila hafa yfir tíu þúsund manns smitast þar.
„Ekki veit ég hve mörgum flugum hingað hefur verið aflýst í sumar og haust, en það er alveg ljóst að sífelldar niðurfellingar ferða hingað frá Íslandi hafa haft veruleg áhrif á ferðir fólks hingað og það þorir ekki nokkur manneskja að panta ferð lengur með ferðaskrifstofunum, enda jafnvíst að ferðin verður felld niður,“ segir Anna í daglegum pistli sínum á Facebook um lífið á Tenerife.
Túristi greinir frá því að bæði Vita og Aventura hafi fellt niður ferðir til Spánar fyrir jólin. Vita hugðist bjóða upp á tvær brottfarir til Tenerife og eina til Las Palmas en allar ferðirnar hafa nú verið sameinaðar í eina. Ekki er víst að þessi breyting henti öllum.
Anna bendir á að þeir fáu Íslendingar sem hafa komið í haust til Tenerife hafi flestir farið í gegnum Bretlandseyjar með EasyJet, því erfitt sé að treysta á íslensku ferðaskrifstofurnar eða Icelandair.
„Mér þykir samt vænt um starfsfólkið hjá Icelandair, enda bera þau enga ábyrgð á niðurfellingunum og vildu gjarnan fá að fljúga alla daga. Nú er heldur betur farið að harðna á dalnum hjá Bretunum því með aukningu smita hér, aðallega með aukningu breskra ferðamanna eru þeir að endurvekja kröfuna um fjórtán daga sóttkví fólks sem kemur frá Tenerife. Þar með hætta Bretarnir að koma og easyjet fellir niður flugin hingað.
Þetta endar með því að við íbúar Tenerife fáum ein að njóta sólar og sumars í Paradís.“
