Andrea Róbertsdóttir, fyrrverandi fjölmiðlakona og framkvæmdastjóri Félags kvenna í atvinnulífinu, er í áhugaverðu viðtali í helgarblaði Fréttablaðsins.
Í viðtalinu fer Andrea um víðan völl og ræðir um jafnréttismálin, starf sitt sem framkvæmdastjóri FKA, áhrif heimsfaraldursins og segir skemmtilega sögu af því þegar hún hitti eitt af átrúnaðargoðum sínum fyrir rúmu ári.
Andrea var fimm ára gömul þegar Vigdís Finnbogadóttir var kjörin forseti Íslands, fyrst kvenna í heiminum og segir hún meðal annars að það hafi skipt máli að hafa þessa kvenkyns fyrirmynd til að máta sig við þegar hún var að alast upp. Það var svo fyrir ári að þær hittust þegar Andrea var ráðstefnustjóri í hátíðarsal Háskóla Íslands þar sem Vigdís var einn gesta.
Andrea spurði Vigdísi að ráðstefnu lokinni hvort hún mætti ekki skutla henni heim.
„Hún þiggur það og þegar ég sé biskup Íslands standa þarna rétt hjá spyr ég hana hvort hún vilji ekki líka far og hún segir já. Við röltum því út á bílaplan þar sem ég svo færi íþróttatöskuna til í aftursætinu svo biskupinn fái pláss þar og Vigdís sest fram í. Svo þar sem ég er að keyra, með Vigdísi við hlið mér og Agnesi biskup í aftursætinu hugsa ég með mér: „Hvar annars staðar en á Íslandi er maður að skutlast með íþróttatöskuna, biskupinn og frú Vigdísi?“
Andrea segir að þetta hafi verið mögnuð stund. „Þetta er svo séríslenskt og geggjað. Þetta var það sérstök stund fyrir mér að ég tók ekki einu sinni „selfie,“ ég vildi bara taka þessa stund inn í núvitund.“
Andrea segist þakklát fyrir margt það sem við búum við hér á landi. „Eins og til að mynda þegar ég fer í sund og forsetinn er þar að synda, og svo fer hann að plokka rusl. Prófum að bera þetta saman við Bandaríkin í dag. Það er svo margt að þakka fyrir á Íslandi.“
Hér má lesa viðtalið við Andreu í heild sinni.
