Andrea Sigurðardóttir, blaðamaður á Viðskiptablaðinu, er ekki par sátt við svörin sem hún fékk á upplýsingafundi Almannavarna í morgun. Andrea beindi spurningu sinni að Guðlaugu Rakel Guðjónsdóttur, starfandi forstjóra Landspítala, og spurði hversu margir væru inniliggjandi vegna Covid en ekki „með Covid“ á Landspítala og hvort það ætti að birta þær tölur líkt og gert væri erlendis.
Guðlaug svaraði henni að sjúklingar sem greindust með Covid á legudeild þurftu sömu þjónustu og þeir sem komi inn vegna Covid, það þyrfti að einangra þá. „Það breytir í sjálfu sér engu í viðbragðinu,“ sagði Guðlaug.
Andrea er ekki sátt við þetta svar. „Ég fékk ekki að koma að athugasemd við svar forstjóra LSH,“ segir hún á Twitter. „Gögnin skipta máli til þess að hægt sé að meta tíðni alvarlegra veikinda. Það er ekki hægt þegar fjöldi í tölfræðinni er ekki inniliggjandi vegna sjúkdómsins. Þetta þótti mér ekki gott svar.“
Andrea heldur áfram:
„En sem sagt helmingur ómíkrón innlagðra nú er þar ekki vegna covid, heldur af öðrum ástæðum og þetta er bara punktstaða. Það verður að birta þessi gögn. Ótrúlegt ógagnsæi!“
Ég fékk ekki að koma að athugasemd við svar forstjóra LSH: Gögnin skipta máli til þess að hægt sé að meta tíðni alvarlegra veikinda. Það er ekki hægt þegar fjöldi í tölfræðinni er ekki inniliggjandi vegna sjúkdómsins. Þetta þótti mér ekki gott svar.
— Andrea Sigurðardóttir (@andreasig) January 5, 2022
