Menning og listir eru partur af heilbrigðikerfinu, segir Brynhildur Guðjónsdóttir borgarleikhússtjóri í samtali við Lindu Blöndal í frétta- og umræðuþættinum 21 á Hringbraut í kvöld, mánudag.
Leikhúsið þurfti að loka vegna Covid sóttvarnarreglna í mars sl.
„Menning og listir, við erum partur af heilbrigðiskerfinu og það er ekkert hægt að segja sem véfengir það. Þetta eru grunnstoðir mannlegs samfélags, samvera, næring að hittast, að gera eitthvað saman, að lyfta andanum. Að vera með fullan maga er eitt og vissulega þurfum við það en að vera með tóma sál og tómt hjarta, þá getum við bara pakkað saman“, segir Brynhildur og spyr einfaldlega: „Til hvers ætlum við að lifa?
Um listir bendir Brynhildur líka á að þegar við þurfum mest á andlegum stuðningi að halda þá sé tónlist, leikhús og söngur það sem allir leita til.
„Hvað gerum við þegar okkur líður vel eða illa? Við syngjum og við dönsum, það fyrsta sem barn gerir þegar það stendur upp er að dilla sér. Það er fásinna að reyna að halda því fram að listir og menning skipti ekki máli. Andlegur dauði er algjör dauði“.
Brynhildur var rétt tekin við sem leikhússtjóri þegar Covid skall á. „Það var engin kokkabók sem lá á borðinu sem ég gat opnað og áttað mig á því hvað ég ætti að gera í þessari stöðu“, segir Brynhildur en mikill hugur sé í fólki í húsinu um að halda áfram.
„Við þurftum að loka húsinu fyrir fullu húsi af gestum, þá fóru fóru stærstu rekstrarmánuðirnir í hönd og við vorum með glænýjan stóran söngleik, Níu líf, sem við náðum að sýna þrjár sýningar af og svo var bara lokað“, segir Brynhldur
Borgarleikhúsið er nú í viðræðum við stjórnvöld um að finna leið til að leikarar geti æft og sýnt leikverk sem til stendur að sýna í haust. Vísað er til rýmkunar á reglum fyrir íþróttafólk í þeim efnum sem Brynhildur telur „hugsanlega“ geta átt við leikhúsin líka.
Borgarleikhúsið boðar sýningar 4. og 11. September nk. og svo að opnað verði formlega með pomp og prakt þann 18. september, en þá verður sýningin Oleanna frumsýnd á Nýja sviðinu – fyrir sextíu manns – svo hægt sé að uppfylla öll tilmæli heilbrigðisyfirvalda um sóttvarnir, segir í tilkynningu Borgarleikhússins.
„Sem þýðir að við erum að taka á móti þrjátíu prósent af sal, 60 manns í 230 manna sal“, bætir Brynhildur við.
Hún segir tíminn sé kominn núna til að horfa til menningarstarfsemi.
„Það er alveg klárt mál að núna verður kastljósinu beint að lista og menningarlífinu því að það liggur bara á hliðinni í landinu og við verðum að komast af stað með einum eða öðrum hætti“
Undanþágubeiðnin lýtur að því að leikarar á sviði geti fengið einhvers kona undanþágu til þess að æfa til jafns við leikmenn í snertiíþróttum með það fyrir augum að leikhúsin geti búið til sínar sýningar og frumsýnt síðan einhvern tímann.
„Það er enginn að fara fram á nokkurn skapaðan hlut sem er eitthvað óraunhæfur eða eitthvað í trássi við það sem skynsamlegt er. Það er bara mjög brýnt að listalífið komist í gang. Þarna ætlum við bara að taka á móti ákveðnum fjölda gesta innan þeirra takmarkana sem við lýði verða“, segir Brynhildur og að innan Borgarleikhússin sé unnið alla daga að því að búa til ólíkar sviðsmyndir: „við erum komin upp í held á Covid númer sjö“, og meinar að leikhúsið sé að undirbúa sig undir alls konar aðstæður á hverjum degi.
„Og yfir þessu sitja menn“, bætir Brynhildur við að allir viðmælendur sem hafi áhrif eða ákvörðunarvald séu jákvæðir. „Ég er mjög bjartsýn þrátt fyrir allt“.
