Dr. Gísli Arnór Víkingsson, sjávarlíffræðingur hjá Hafrannsóknastofnun, er látinn, 65 ára að aldri. Hann varð bráðkvaddur í fjölskylduferð á Ítalíu. Þetta kemur fram í frétt mbl.is.
Gísli fæddist hinn 5. ágúst 1956 og voru foreldrar hans hjónin Víkingur Heiðar Arnórsson, læknir og prófessor, og Stefanía Gísladóttir.
Gísli ólst upp í Reykjavík og svo í Svíþjóð, þangað sem fjölskyldan flutti þegar faðir hans fór í framhaldsmenntun í læknisfræði. Hann lauk B.Sc. prófi í líffræði við Háskóla Íslands árið 1979 og hélt síðan til Danmerkur, þar sem hann lauk cand.scient. prófi í atferlisvistfræði frá Kaupmannahafnarháskóla árið 1985.
„Á meðan á náminu í Danmörku stóð kynntist hann konu sinni, Guðrúnu Ögmundsdóttur, félagsráðgjafa og alþingismanni. Þau hófu sambúð 1980 og eignuðust þau hjónin tvö börn, Ögmund Viðar Rúnarsson og Ingibjörgu Helgu Gísladóttur. Guðrún lést á gamlársdag 2019,“ segir í frétt mbl.is
Heimkominn úr námi starfaði Gísli stutt hjá Blóðbankanum, en réðist til Hafrannsóknastofnunar 1986, þar sem hann starfaði æ síðan. Hann vann þar í upphafi náið með Jóhanni Sigurjónssyni, sem þá var eini hvalasérfræðingur landins, en aukinn kraftur var þá að færast í hvalrannsóknir. Þegar Jóhann var ráðinn forstjóri Hafrannsóknastofnunar, tók Gísli við sem yfirmaður hvalrannsókna og ávann sér virðingu sem fremsti hvalasérfræðingur landsins.
Árið 2016 hlaut Gísli doktorsgráðu í vistfræði hvala frá sjávarlíffræðideild Háskólans í Tromsø í Noregi, en ritgerð hans fjallaði um áratugalangar breytingar á útbreiðslu, stofnstærðum og fæðuvistfræði skíðishvala í hafinu umhverfis Ísland og hvort þar ræddi um afleiðingar loftslagsbreytinga.
Gísli var hneigður til tónlistar eins og fleiri í fjölskyldunni og lék m.a. með hljómsveitunum Kamarorghestum og Puntstráunum á árum áður.
