Þann 25. janúar síðastliðinn voru niðurstöður Íslensku ánægjuvogarinnar 2018 kynntar. Ánægðustu viðskiptavinirnir eru hjá bensínstöð Costco en Nova, Vínbúðir ÁTVR, BYKO og Icelandair hlutu einnig viðurkenningar í ár. Er þetta tuttugasta árið sem ánægja íslenskra fyrirtækja er mæld með þessum hætti.
Í ár voru afhentar viðurkenningar á fimm mörkuðum. Á eldsneytismarkaði fékk bensínstöð Costco 82,3 stig af 100 mögulegum, á farsímamarkaði fékk Nova 75,8 stig, á smásölumarkaði fengu Vínbúðir ÁTVR 73,6 stig, á byggingavörumarkaði fékk BYKO 68,9 stig og á flugmarkaði fékk Icelandair 75,4 stig.
Costco eldsneyti var einnig með marktækt hæstu einkunn allra fyrirtækja sem mæld voru í Ánægjuvoginni þetta árið og eru viðskiptavinir eldsneytissölu Costco þar af leiðandi þeir ánægðustu á Íslandi. Costco er þó ekki með ánægðustu viðskiptavinina á smásölumarkaði, en þar var Costco með þriðju lægstu einkunnina, 65,9 stig.
Íslenska ánægjuvogin er í eigu Stjórnvísis og sá Zenter rannsóknir um framkvæmd á mælingunum.
