Alma D. Möller landlæknir segist ekki hafa grunað að hún myndi nokkurn tímann standa frammi fyrir viðlíka ógn og nú er af völdum COVID-19 faraldursins.
Þetta er meðal þess sem kemur fram í viðtali við Ölmu í sunnudagsblaði Morgunblaðsins. Þar ræðir Alma meðal annars um starf sitt og faraldurinn sem nú geisar, en samkvæmt nýjustu tölum nálgast fjöldi smita hér á landi 600.
„Auðvitað hefur maður hugsað um heimsfaraldra og ég var komin heim til Íslands þegar SARS- faraldurinn, sem er skyldur þessum, gekk yfir árið 2003. Við fórum þá í vinnu og undirbjuggum ýmsa hluti sem við búum að núna. Þegar svínaflensan gekk yfir vann ég á gjörgæslunni og hún olli miklu álagi en við réðum vel við það. Það komu 170 sjúklingar á spítalann og sextán á gjörgæslu en þeir dreifðust vel yfir tíma. Í kjölfarið var gerð áætlun um heimsfaraldur þannig að hún var til. En auðvitað erum við að læra mikið. Ég var ekki búin að sjá þetta fyrir,“ segir Alma meðal annars í viðtalinu.
Alma segir jafnframt í viðtalinu að auðvitað ríki óvissa enda faraldurinn á mikilli ferð. Það sé áhyggjuefni þegar ný veira kemur, ekki síst þegar veiran er meira smitandi en inflúensa.
„Við sjáum hvað gerðist í Kína og hvað er að gerast á Norður-Ítalíu. Þetta er mjög alvarlegur faraldur og veldur gríðarlegu álagi á heilbrigðiskerfið. En ég er mjög sátt við framgöngu sóttvarnalæknis og er sátt við aðgerðirnar. Það er mikilvægt að fræða almenning og mér finnst það hafa gengið vel. Það hjálpar okkur í því hvað við erum fámenn,“ segir Alma meðal annars í Morgunblaðinu.
