Allir sem koma til landsins fara í sótt­kví og tvær sýna­tökur

Katrín Jakobs­dóttir for­sætis­ráð­herra sagði á blaða­manna­fundi ríkis­stjórnarinnar í dag að allir þeir sem koma til landsins frá og með 19. ágúst næst­komandi verði skimaðir tvisvar. Þá verði far­þegum gert að sæta fjögurra til fimm daga sótt­kví.

Ríkis­stjórnin boðaði til blaða­manna­fundar í morgun vegna skimana á landa­mærunum en nú liggur fyrir að breytingar verða gerðar eftir aukinn fjölda smita hér á landi. Þetta er sama leið og Þór­ólfur Guðna­son sótt­varna­læknir taldi á­hrifa­ríkasta út frá sótt­varna­sjónar­miðum.

Þeir far­þegar sem koma til landsins frá og með 19. Ágúst þurfa að gangast undir sýna­töku áður en þeir fara í fjögurra til fimm daga sótt­kví, eða uns niður­stöður úr seinni sýna­töku berast.

„Þessi á­kvörðun er tekin í ljósi þess hvernig veiran hefur þróast á heims­vísu og hér innan lands. Tíðni smita vegna Co­vid-19 fer vaxandi í ná­granna­löndum og um allan heim. Þá er enn verið að kljást við hóp­sýkingu sem upp hefur komið hér á landi án þess að vitað sé hvernig það af­brigði veirunnar barst inn í landið. Loks liggur fyrir að sótt­varna­læknir telur þessa leið á­hrifa­ríkasta frá sótt­varna­sjónar­miði,“ segir í til­kynningu frá stjórnar­ráðinu.

Undan­farið hafa far­þegar frá til­teknum ríkjum verið undan­skildir en það verður ekki lengur.

„Í þeim ríkjum er far­aldurinn að taka sig upp að nýju og erfitt hefur reynst að hafa eftir­lit með því að far­þegar hafi í raun dvalið 14 daga í við­komandi landi. Þá ber öllum að fara í sýna­töku 2 til þess að tryggja betur að smit greinist hjá þeim sem eru ný­lega smitaðir. Hingað til hefur sú krafa einungis átt við Ís­lendinga og þá sem hér eru bú­settir eða koma til lengri tíma dvalar.“

Þá kemur fram að reglur um for­skráningu far­þega verði hertar til þess að tryggja að nauð­syn­legar upp­lýsingar liggi fyrir áður en komið er til landsins.

„Þessi á­kvörðun er byggð á þeirri verð­mætu reynslu sem fengist hefur við skimun á landa­mærum frá 15. júní sl. þar sem sam­starf heilsu­gæslunnar, Land­spítala og Ís­lenskrar erfða­greiningar hefur verið lykil­at­riði undir yfir­stjórn sótt­varna­læknis og með full­tingi landa­mæra­eftir­lits og al­manna­varna­deildar lög­reglu. Nú eru reglur hertar til að lág­marka enn frekar hættuna á nýjum smitum með öryggi lands­manna og lýð­heilsu að leiðar­ljósi. Með þessu er talið að dregið verði úr líkum á því að frekari raskanir verði á dag­legu lífi lands­manna vegna sótt­varnar­að­gerða innan­lands.“