Álf­heiður með skýr skila­boð: Meðan þið sváfuð var ríkis­stjórnin í vinnunni

Álf­heiður Inga­dóttir, fyrr­verandi heil­brigðis­ráð­herra og þing­maður VG á árunum 2007 til 2013, lætur stjórnar­and­stöðuna heyra það hressi­lega í grein sem hún skrifar í Frétta­blaðið í dag.

„Daginn sem 17 innan­lands­smit greindust var eins og stjórnar­and­staðan hefði hrokkið fram úr rúminu – stein­sofandi – með allt á hornum sér eins og gjarnt er um þá sem þannig fer fyrir. Ekki að það væri ó­vænt, yfir­völd höfðu marg­sagt að veiran myndi berast hingað aftur,“ segir Álf­heiður sem segir að nú virðist staðan þannig að fum­lausar en ó­vin­sælar að­gerðir stjórn­valda fyrir verslunar­manna­helgi hafi náð að stöðva nýjan far­aldur í fæðingu. Þá hafi, sem áður, verið farið að til­lögum sótt­varna­læknis.

„Það var líka að ráði sótt­varna­læknis að hafin var skimun á landa­mærum 15. júní. Stjórnar­and­staðan mót­mælti því ekki, þvert á móti, en nú á skimunin að vera pólitísk að­gerð, runnin undan rifjum ferða­þjónustunnar sem ríkis­stjórnin hafi beygt sig undir. Ekkert er fjær sanni. Landið var aldrei lokað og skimunin skilar góðum árangri, eins og smit­hlut­fallið sýnir. For­maður Við­reisnar segir að ríkis­stjórnin sé að koma úr löngu sumar­fríi. Margur heldur mig sig! Ríkis­stjórnin hefur sannar­lega ekki verið í fríi – frá byrjun júní hafa verið haldnir 15 ríkis­stjórnar­fundir, for­sætis­ráð­herra og aðrir ráð­herrar hafa unnið náið með sínu mála­sviði: mennta­mála­ráð­herra með skólunum, ferða­mála­ráð­herra með ferða­bransanum, sam­göngu­ráð­herra með sveitar­fé­lögum, fé­lags­mála­ráð­herra með verka­lýðs­hreyfingu og svo má á­fram telja. Meðan stjórnar­and­staðan svaf sumar­langt voru sótt­varna­yfir­völd og ríkis­stjórn nefni­lega í vinnunni sinni, reiðu­búin til að takast á við vanda hvers dags, en einnig að undir­búa að­gerðir til lengri tíma,“ segir hún.

Hún segir að þessi vinna verði kynnt á haust­þingi, meðal annars í fjár­mála­á­ætlun næstu fimm ára og fjár­laga­frum­varpi fyrir næsta ár og CO­VID-að­gerðum til mót­vægis við á­hrif veirunnar á sam­fé­lagið.

„Mark­miðið er sem fyrr að tryggja heilsu þjóðarinnar og halda sam­fé­laginu gangandi. Það er mikil­vægt að hrósa því sem vel er gert og benda á hvað betur má fara. En stjórnar­and­staða sem rumskar þegar verst lætur og hefur lítið til málanna að leggja annað en nei­kvæðni og nöldur ætti að leggja sig aftur. Það er oft betra að takast á við verk­efni dagsins eftir við­bótar­blund.“