„Ég kalla eftir því að ráðherrar gangist tafarlaust við hlutverki sínu sem leiðtogar, hætti öllum almennum sóttvarnaaðgerðum, geri viðeigandi ráðstafanir í heilbrigðiskerfinu og leyfi okkur að halda áfram með lífið,“ segir Alexander Ingi Olsen í grein sem hann skrifar í Morgunblaðið í dag.
Hann titlar sig sem atvinnulausan flugmann og er mjög svartsýnn á ástandið í Covid-faraldrinum hér á landi.
„Það hljóta margir að spyrja sig nú hvenær þetta ástand muni enda, sérstaklega við sem skiljum að þriðja sprautan verður ekki töfralausnin sem ráðherrarnir treysta á. Það getur hver maður reiknað hve lengi þjóðin verður að ná hjarðónæmi ef yfirvöldum tekst að halda smitum í kringum 50 á dag líkt og áformað er, það tæki áratugi,“ segir hann.
„Það er engin samstaða um slíkt og ætti ekki að vera. Það er augljóst að skaðinn af því verður margfaldur samanborið við áhlaup á heilbrigðiskerfið, með eða án ráðstafana til að bregðast við því. Við höfum öll rétt á að lifa þessu eina lífi sem við fáum, burtséð frá rekstrarvanda einstakra ríkisstofnana.“
Tekur hann dæmi frá Norðurlöndunum, í dag sé faraldurinn ekkert samfélagslegt vandamál í Svíþjóð. „Í dag er raunin sú að þrátt fyrir nær engar aðgerðir er faraldurinn ekkert samfélagslegt vandamál í Svíþjóð, lífið þar er eðlilegt. Þrátt fyrir að margir hafi veikst illa þar er heildardánartíðni í Svíþjóð á pari við fyrri ár og enn fremur nú orðin lægri en í Danmörku. Nú má túlka það á ýmsa vegu en ein túlkunin er sú, líkt og sumir spáðu, að aðgerðir í Danmörku hafi nú dregið fleiri til dauða en faraldurinn í Svíþjóð. Það má velta fyrir sér hvort hið sama verði upp á teningnum á Íslandi fyrr eða síðar.“
Tekur Alexander Ingi annað dæmi frá Bandaríkjunum. „Fjöldi ríkja í Bandaríkjunum hefur ákveðið að fara sömu leið en Flórída aflétti fyrst ríkja öllum almennum aðgerðum fyrir rúmu ári. Í dag er smittíðni þar ein sú lægsta í Bandaríkjunum og lífið eðlilegt.“
