„Við eigum að láta gott af okkur leiða og það þarf ekki að vera stórt,“ segir Alexander Kristjánsson hjá RVK Hair í samtali við Fréttablaðið í dag.
Í fréttinni kemur fram að Alexander ætli sjálfur að gefa heilli fjölskyldu ókeypis klippingu í hverjum mánuði og vill hann endilega að fólk hafi samband við hann. Leggur hann áherslu á að engin nöfn verði birt né gjöfin auglýst frekar.
„Mig langar til að skora á aðra sem eru aflögufærir að gera slíkt hið sama. Þessi vetur verður strembinn fyrir marga en við komumst í gegnum hann saman.“
Alexander segir að mikið hafi verið að gera undanfarna mánuði þrátt fyrir heldur skrýtið ástand vegna COVID-19. Hann segir að kollegar hans á öðrum stofum hafi svipaða sögu að segja.
„Það koma alveg jafnmargir í klippingu og áður. Eina breytingin er sú að við þurfum að huga vel að sóttvörnum, setja upp grímur í vinnunni og spritta okkur. Á meðan sumir geirar finna ekki fyrir neinum samdrætti að ráði þá eru aðrir geirar rjúkandi rúst. Mér finnst að í slíkum aðstæðum verði samfélagið að standa saman og þeim sem eiga þess kost að geta lagt eitthvað af mörkum eigi að gefa til baka.“
Veistu um fleiri jákvæðar fréttir? Endilega sendu okkur skilaboð í gegnum Facebook-síðu Hringbrautar.
