Aldís Schram gagnrýnir Guðjón St. Marteinsson héraðsdómara harðlega eftir að hann sýknaði Jón Baldvin Hannibalsson, fyrrverandi ráðherra og föður Aldísar, af ákæru um kynferðislegt áreitni árið 2018 í garð Carmenar Jóhannsdóttur, í grein sem hún birtir á vef Stundarinnar.
Jón Baldvin neitaði sök og sagði að hann hefði verið leiddur í gildru, þá hafi þetta eyðilagt ævikvöldið. Bryndís Schram, eiginkona hans og móðir Aldísar, hefur staðið með eiginmanni sínum og hafnaði því alfarið fyrir dómi að neitt hafi átt sér stað.
Sjá einnig: Bálreiður Jón Baldvin segir málið hafa eyðilagt ævikvöldið
Aldís segir í greininni á Stundinni að Bryndís hafi játað í bréfi sem dómarinn hafi ekki tekið til greina. „· Hann greinir ekki frá bréfi Bryndísar sem lagt var fram í málinu, þar sem skrifað stendur: „Jón Baldvin ... skilur ekki enn að hann hafi brotið af sér“ og þar með heldur leyndum upplýsingum um játningu Bryndísar á broti ákærða,“ segir Aldís.
Þess í stað hafi Jón Baldvin einmitt verið sýknaður vegna vitnisburðar Bryndísar og vinkonu þeirra Hugrúnar Auðar Jónsdóttur. Aldís telur vitnisburð Hugrúnar heldur ekki trúverðugan. „Það stangast á við vitnisburð ákærða og á hún, að sögn Guðjóns, að hafa „snúið sér að“ brotaþola þegar ákærði káfaði á henni og því getað séð hvað gerst hafði! Sem vekur upp þá spurningu, hvernig er hægt að sjá rass á manneskju sem snýr að manni? Er Hugrún með röntgenaugu?! Þessi langsótta niðurstaða héraðsdómarans er sem sé hvorki rökræn og né skynsamleg, í það minnsta að mínu mati, eða með öðrum orðum hálfvitaleg.“
Þá gagnrýnir hún dómarann fyrir að taka ekki til greina vitni sem Carmen hringdi í þetta kvöld. Einnig að fjalla ekki um í dómnum málsvörn Jóns Baldvins um að kvöldverðurinn hafi verið hluti af samsæri. „…að hún hefði að mínu undirlagi þegið heimboð Bryndísar svo ákærði fengi að káfa á klofi dóttur hennar! Sem einnig var málsvörn Jóns í meiðyrðamáli hans gegn mér, sem hann tapaði…,“ segir Aldís.
