„Það er því virkilega dapurlegt fyrir mig að meirihluti uppstillingarnefndar telji ekki rétt að ég verði í líklegu þingsæti fyrir næstu kosningar,“ segir Ágúst Ólafur Ágústsson, þingmaður Samfylkingarinnar í pistli á Facebook-síðu sinni.
Eins og Fréttablaðið greindi frá á dögunum var Ágústi Ólafi hafnað í skoðanakönnun sem haldin var meðal félaga í Samfylkingunni í desember. Aðeins einn karlmaður var í hópi þeirra fimm sem flestir vildu að tækju forystusæti á listum Reykjavíkurkjördæmanna tveggja í kosningunum næsta haust. Ágúst Ólafur var ekki þar á meðal.
„Samfylkingunni hefur gengið mjög vel á kjörtímabilinu, ekki síst í Reykjavík. Við höfum staðið í uppbyggingarstarfi hjá flokknum og höfum rekið málefnalega en aðhaldsríka stjórnarandstöðu á erfiðum tímum. Ég hef tekið virkan þátt í því starfi og tel mig hafa verið mikilvægan þingmann fyrir flokkinn á þessu kjörtímabili,“ segir Ágúst sem segir dapurlegt fyrir hann að meirihluti uppstillingarnefndar telji ekki rétt að hann verði í líklegu þingsæti fyrir næstu kosningar.
„Þó gagnrýna megi ýmislegt varðandi aðferðina þá virði ég um leið rétt nefndarinnar til að taka sína ákvörðun. Ég hef fundið fyrir miklum stuðningi í mínum störfum á Alþingi og ég tel mig hafa átt þátt í þeirri velgengni sem flokkurinn hefur notið. Samfylkingin hefur verið að mælast stærsti stjórnmálaflokkurinn í því kjördæmi sem ég leiði. Ég hef látið mig varða mikilvæg málefni ekki síst á vettvangi fjármála en einnig þegar kemur að málefnum öryrkja, aldraðra, menningar, geðheilbrigðismála og dýraverndar.“
Ágúst segist hafa boðið uppstillingarnefnd sáttatillögu sem fælist í því að hann færi úr oddvitasætinu í kjördæminu í nafni nýliðunar og tæki annað sætið.
„Þeirri tillögu var hafnað af meirihluta uppstillingarnefndar. Þessi niðurstaða er mér vissulega vonbrigði en ég horfi stoltur til baka yfir feril minn í stjórnmálum og er ég mjög þakklátur fyrir að hafa fengið tækifæri til að vinna að betra samfélagi.“
