Ágúst Ólafur: Vissir þú af þessari starf­semi hér á landi? – Í meira lagi vafa­samt

„Þetta er stór iðnaður á Ís­landi,“ segir Ágúst Ólafur Ágústs­son, þing­maður Sam­fylkingarinnar, í pistli sem hann birti á Face­book-síðu sinni um helgina.

Í pistlinum skrifaði Ágúst Ólafur um svo­kallaðar blóð­merar, en þá er blóð tekið úr fyl­fullum merum. Til­gangurinn er að vinna dýr­mætt hormón sem finna má í fylgjunni, en það hefur meðal annars því hlut­verki að gegna að örva starf­semi eggja­stokka. Hormónið er einna helst notað í svína­rækt.

Ágúst Ólafur rifjaði upp að hann hefði tekið málið upp á Al­þingi fyrr á þessu ári og þá kom í ljós að um 5.000 ís­lenskrar hryssur væru notaðar í þessum til­gangi. Benti hann á að taka mætti 5 lítra af blóði úr hverri hryssu í 8 skipti á hverju tíma­bili.

Ágúst var í við­tali um málið í sænsku tíma­riti á dögunum, en titill greinarinnar er „Hið rauða gull Ís­lands (s. Is­lands röda guld). Ágúst deilir við­talinu sem birtist á vef Sveri­ges Natur þann 25. nóvember síðast­liðinn.

„Þar kemur fram að fram­leiðslan hafi þre­faldast síðan 2009. Einnig segir þar for­svars­maður ís­lenska fyrir­tækisins sem stundar þetta hér að „ef varan okkar væri jafn­dýr og gull værum við gjald­þrota á morgun“. Blaða­maðurinn segir að það var nokkuð erfitt að ræða þessi mál hér á landi enda hálf­gert þagnar­gildi um þessa starf­semi. Eða hvað, vissir þú af þessari starf­semi?,“ spyr þing­maðurinn.

Hann er sjálfur þeirrar skoðunar að það sé virki­lega vafa­samt að gera merar fyl­fullar til að hægt sé að auka af­köst svína­ræktunar.

„Ýmsar aðrar þjóðir hafa bannað þessa fram­kvæmd og Svíar hættu þessu fyrir hart­nær 15 árum. Nú er um­ræða á Evrópu­þinginu að banna inn­flutning á þessum hormónum frá S-Ameríku eftir 2 milljónir undir­skrifta söfnuðust fyrir slíku. Ís­lenski hesturinn á betra skilið en þessa nýtingu á honum,“ segir hann.

Ágúst Ólafur lagði fram fyrir­spurn um málið fyrr á árinu og í svari sjávar­út­vegs- og land­búnaðar­ráð­herra kom fram að hryssu­blóði hefði verið safnað úr fyl­fullum hryssum í kjöt­fram­leiðslu hér á landi í um 40 ár. Var blóð­taka úr hrossum til fram­leiðslu af­urða stunduð á vegum 95 aðila hér á landi á síðasta ári.