„Er ekki skrýtið að hér séu leyfðar stórhvalaveiðar eins manns? Og það á næststærsta dýri jarðar sem er, nota bene, í útrýmingarhættu sé litið á heimsválista (það að réttlæta drápin með þeim rökum að nóg sé af tegundinni við Íslandsstrendur er svipað og að réttlæta dráp á orangútum á Borneo því þar sé þá helst að finna),“ skrifar Ágúst Ólafur Ágústsson, fyrrverandi þingmaður Samfylkingarinnar.
„Er ekki skrýtið að Ísland er eina hestaþjóðin (sem við viljum bera okkur saman við) sem kemur fram við hestana sína með blóðmerahaldi svo hægt sé að auka framleiðslu svína út í heimi?“ heldur Ágúst Ólafur áfram.
„Er ekki skrýtið að hér er stunduð ræktun á þúsundum minka til að hægt sé að flá skinn þeirra í pelsa? Og það í rekstri sem iðulega stendur ekki einu sinni undir sér.
Hvernig er hægt að fá þjóðina (og ekki síst stjórnvöld) til að vera jafn umhugað um dýralíf og dýraaðbúnað eins og hún er þegar umræðan fer að snúast um fossa og árfarvegi?“ spyr Ágúst Ólafur að lokum.
