Ágúst Ólafur Ágústsson, þingmaður Samfylkingarinnar, segir nokkuð ljóst að COVID-19 sjúkdómurinn sé ekki síðasti heimsfaraldurinn sem mannkynið þarf að klást við.
Ágúst Ólafur skrifar um þetta í Fréttablaðið í dag. Hann segir að ef við breytum ekki um stefnu í samneyti okkar við dýr, aðbúnað þeirra og framleiðslu muni ekki líða langur tími þar til við þurfum að kljást við ættingja veirunnar.
„Það er nokkuð víst að COVID-19 sjúkdómurinn er ekki síðasti heimsfaraldurinn sem mannkynið þarf að kljást við. En hvernig tengist sú staðreynd dýravelferð? Nú búa um 8 milljarðar manna á jörðinni en þeir voru um helmingi færri þegar ég fæddist fyrir rúmum 40 árum. Jarðarbúar stefna í að verða um 10 milljarðar eftir um 30 ár. Samhliða þessari miklu fjölgun jarðarbúa hefur kjötframleiðsla aukist mjög mikið með tilheyrandi samneyti við dýr,“ segir Ágúst Ólafur.
Hann bendir á að nú sé talið að rekja megi kóróna-veiruna frá leðurblökum til hreisturdýra og þaðan til manna. SARS-faraldurinn, svínaflensuna, fuglaflensurnar og fleiri faraldra megi einnig rekja til náins samneytis manns og dýra.
„Vegna hrikalegra aðstæðna á matarmörkuðum úti í hinum stóra heimi geta þeir virkað sem gróðrarstía fyrir stökkbreyttar veirur og sem stökkpallur veiru á milli tegunda.“
Ágúst Ólafur segir að í þessu ljósi megi velta fyrir sér hvernig við komum í veg fyrir að minnsta kosti lágmörkum hættuna á fleiri hættulegum sjúkdómum í framtíðinni.
„Það þarf að huga miklu betur að þeim aðstæðum sem dýrin búa við ásamt hinni gegndarlausu kjötframleiðslu. Einungis þrjár húsdýrategundir, það er kjúklingar, svín og nautgripir, vega meira en öll önnur dýr, þar með talið mannfólkið, samanlagt á jörðinni. Það er bæði upplýsandi og hrollvekjandi staðreynd,“ segir hann og bætir við að við munum ráða niðurlögum kórónuveirunnar með vísindin að vopni. Hættan sé að ættingjar veirunnar láti á sér kræla ef við breytum ekki um stefnu.
„Dýravelferð er nátengd velferð mannsins og það er mjög ljóst í núverandi ástandi. Hugsum vel um dýr. Þá farnast okkur mönnunum vel.“
