Heldur dró úr úrkomu og vatnsaga á Seyðisfirði í gærkvöldi og nótt. Síðasta aurskriðan sem vitað er um féll um klukkan tíu í gærkvöldi en eftir það virðist ástand hafa náð meira jafnvægi. Engar skriður hafa fallið í morgun eftir því sem best er vitað. Beðið er birtingar til að kanna betur aðstæður.
Þetta kemur fram í tilkynningu frá lögreglunni á Austurlandi.
Þeir íbúar sem rýmt hafa hús sín og þurfa nauðsynjar eru hvattir til að leita í Sæból, hús björgunarsveitarinnar Ísólfs á Seyðisfirði. Þar bíður aðstoð við að fara inn á svæðið auk nýjustu upplýsinga.
Lögreglan stefnir að því frá og með hádegi í dag að senda reglulega SMS skilaboð til þeirra sem eru á Seyðisfirði með upplýsingum og leiðbeiningum. Skilaboðin eru send í samvinnu við Fjarskiptamiðstöð ríkislögreglustjóra. Upplýsinga fyrir íbúa á Seyðisfirði er því að leita í björgunarsveitarhúsinu á Seyðisfirði auk þess sem fréttatilkynningar verða reglulega sendar á þessum vettvangi og á fésbók lögreglu auk SMS skilaboða eins og áður sagði. Þá má leita upplýsinga á heimasíðu Múlaþings, mulathing.is.
Fjallað er um atburðina fyrir austan á Facebook-síðu Bliku sem veðurfræðingurinn Einar Sveinbjörnsson heldur úti. Hann segir að fá klukkan 9 að morgni síðastliðins mánudags og þar til nú sé mæld úrkoma á Seyðisfirði um 270 millimetrar.
„Í nýlegu uppfærðu mati Veðurstofunnar á endurkomutíma úrkomu fyrir 43 stöðvar má heimfæra þetta úrkomumagn 48 klst. til 50 ára atburðar. Sem sé endurkomutími þetta mikillar úrkomu er um 50 ár og jafnvel rúmlega það,“ segir í færslunni en matið byggir á mælingum á árunum 1979 til 2017.
Spár gera ráð fyrir að heldur dragi úr úrkomu í dag en þó má gera ráð fyrir 30-40 millimetrum á Seyðisfirði. „Meiri rigning á láglendi hins vegar í nótt og á morgun og spáð 70-80 mm á 36 klst fram á miðjan föstudag,“ segir Einar og bætir við að samtals gætu þetta því orðið 450 til 500 millimetrar á Seyðisfirði á um 10 dögum. „Það telst vera aftakamikil (e. extreme) úrkoma á alla hérlenda mælikvarða.“
Til samanburðar má geta þess að ársúrkoma í Reykjavík árið 2019 var 867,8 millimetrar en á Akureyri var hún 692,8 millimetrar.
