Afi dæmdur fyrir kyn­ferðis­brot gegn barna­barni og vörslu barna­níðs­efnis

Héraðs­dómur Reykja­ness hefur dæmt karl­mann í tveggja og hálfs árs ó­skil­orðs­bundið fangelsi fyrir kyn­ferðis­brot og vörslu efnis sem sýndi barna­níð.

Fórnar­lambið í málinu var stjúp­barna­barn mannsins en í á­kæru kemur fram að hann hafi í nokkur skipti frá árinu 2018 og fram til júní­mánaðar 2019 „haft önnur kyn­ferðis­mök en sam­ræði“ við stúlkuna með því að láta hana fróa sér.

Maðurinn var einnig á­kærður fyrir að hafa í vörslu sinni fimm ljós­myndir sem sýndu börn á kyn­ferðis­legan eða klám­fenginn hátt. Loks var hann á­kærður fyrir að hafa á árunum 2016 til 2019 í­trekað skoðað barna­níðs­efni á netinu. Á far­símum sem lög­regla lagði hald á fannst eitt slíkt mynd­band og 2.537 slíkar ljós­myndir í flýtiminni símanna og á far­tölvu mannsins.

Maðurinn neitaði sök fyrir dómi en dómari horfði meðal annars á upp­töku af fram­burði stúlkunnar fyrir dómi í barna­húsi og mat hann trú­verðugan. Taldi dómari úti­lokað að barn gæti lýst at­höfnum eins og hún gerði án þess að hafa upp­lifað þær með ein­hverjum hætti.

Maðurinn var einnig sak­felldur fyrir seinni á­kæru­liðina, vörslu barna­níðs­efnis og að hafa skoðað slíkt efni. Hann neitaði sök hvað þá liði varðar og sagðist ekki vita hvernig myndirnar komu upp á yfir­borðið. Dómari mat fram­burð mannsins hins vegar ó­trú­verðugan.

„Með hlið­sjón af því mikla magni af smá­myndum í flýtiminni síma á­kærða og þeim skrám, sem benda til barna­níðs, sem fundust í tölvum hans og flakkara, verður að telja úti­lokað að allt þetta efni hafi verið í búnaði á­kærða án þess að hann hafi nokkurn tímann skoðað alla vega hluta þess. Þá liggur fyrir að í tölvum á­kærða fundust fimm ein­tök af sömu ljós­myndinni sem sýna barn á kyn­ferðis­legan eða klám­fengin hátt, sbr. á­kæru­lið 2. Á­kærði kannaðist ekki við þessa mynd en telja verður úti­lokað að hún hafi getað vistast á fimm mis­munandi stöðum í tölvum hans án þess að honum hafi verið kunnugt um vörslur sínar á myndinni,“ segir í niður­stöðu dómara.

Dómurinn yfir manninum er sem fyrr segir ó­skil­orðs­bundinn en auk þess var honum gert að greiða stjúp­barna­barni sínu eina og hálfa milljón króna í miska­bætur. Þá var honum gert að greiða laun verjanda síns, 1,6 milljónir króna og þóknun réttar­gæslu­manns, 700 þúsund krónur.