Félag sem er í eigu hjónanna Steinunnar Margrétar Tómasdóttur og Aðalsteins Karlssonar hefur fest kaup á Garðastræti 37. GAMMA Capital Management, dótturfélag Kviku banka, var með starfsemi í þessu sama húsi í mörg ár.
Greint er frá kaupunum í Fréttablaðinu í dag. Aðalsteinn er fjárfestir og fyrrverandi eigandi heildverslunarinnar A. Karlsson.
Það var eignarhaldsfélagið SMT100 sem keypti húsið og var kaupverðið um 420 milljónir króna. Óvíst er hvaða starfsemi verður í húsinu sem er 680 fermetrar með 977 fermetra lóð.
Í frétt Fréttablaðsins er bent á að GAMMA hafi keypt húsið árið 2013, en það var reist í lok fjórða áratugar síðustu aldar. Er það á meðal elstu fúnkishúsa landsins og hýsti það til dæmis lengi vel starfsemi Síldarútvegsnefndar.
