„Framundan er dimmur vetur og nýkynnt fjárlagafrumvarp varpar ekki ljósi inn í hann. Þvert á móti má ætla af því, að nú eigi kné að fylgja kviði og áfram skuli níðst á atvinnugrein sem er illa löskuð.“
Þetta segir Aðalgeir Ásvaldsson, framkvæmdastjóri SVEIT, samtaka fyrirtækja á veitingamarkaði, í aðsendri grein sem birtist á vef Vísis. Samkvæmt nýkynntu fjárlagafrumvarpi ætlar ríkið að hækka álögur á áfengi og eru veitingamenn ósáttir við það – skiljanlega myndu eflaust margir segja.
Samtökin lýsa yfir gríðarlegum vonbrigðum með fyrirhugað hækkun áfengisgjalda og segja að það sé með ólíkindum að hæstu áfengisskattar í Evrópu dugi ekki sitjandi ríkisstjórn.
„Í því samhengi er boðuð 7,7% hækkun á áfengisgjaldi með öllu ólíðandi, enda mun hún annað hvort koma úr tómum vasa veitingamanna eða fara út í verðlagið, sem aftur stuðlar að hærra verðlagi og viðvarandi verðbólgu.
Veitingageirinn hefur barist í bökkum síðastliðin ár. Há opinber gjöld og óhagstæðir kjarasamningar hafa haldið greininni í spennitreyju um árabil og Covid-aðgerðir stjórnvalda riðu mörgum fyrirtækjum að fullu,“ segir Aðalgeir og bætir við að veitingamenn séu andvaka yfir ástandinu.
„Framundan er dimmur vetur og nýkynnt fjárlagafrumvarp varpar ekki ljósi inn í hann. Þvert á móti má ætla af því, að nú eigi kné að fylgja kviði og áfram skuli níðst á atvinnugrein sem er illa löskuð. A.m.k. setur veitingamenn hljóða við skilaboðin frá hinu opinbera, enda felast í þeim brotin loforð og dapurlega sýn sem heldur vöku fyrir veitingamönnum. Að óbreyttu er ljóst að afleiðingarnar af hækkandi álögum verða alvarlegar og veitingastöðum mun fækka.“
Aðalgeir spyr svo hvort veitingamenn megi ekki bara reka fyrirtækin sín í friði.
„Á tyllidögum segjumst við búa í frjálsu hagkerfi, þar sem framboð, eftirspurn og frammistaða fyrirtækja ræður mestu um afkomuna. Raunin er hins vegar sú, að samfélaginu er miðstýrt úr hófi og atvinnufrelsi er í raun takmarkað vegna inngrips stjórnvalda, verðhækkana og afskipta sem hafa skaðleg áhrif fyrir einkarekin fyrirtæki. Á sama tíma stækkar báknið, starfsfólki fjölgar, boðleiðir lengjast og tíminn sem fer í að leysa einföld mál,“ segir Aðalgeir.
Hann bætir við að ákveðinnar bjartsýni hafi gætt eftir sumarið enda ferðamannastraumurinn mikill.
„Mörgum ferðamanninum þykir hins vegar nóg um verðlagið hér á Fróni, sem er með því hæsta í heimi – ekki síst á áfengum drykkjum. Veruleg hækkun á opinberum áfengisgjöldum er síst til þess fallin að auka samkeppnishæfni Íslands eða stuðla að auknum fjölda ferðamanna. Þvert á móti er hún fráhrindandi og minnkar aðdráttarafl okkar í alþjóðlegu samhengi.“
