Guðjón Sigurðsson, formaður MND á Íslandi, skorar á borgarstjórn Reykjavíkur að bæta aðgengi að Viðey. Hann sendi áskorunina í dag á borgarstjórn og fjölmiðla.
Guðjón segir það vera sárt að horfa á ferjuna sigla frá bryggjunni og geta ekki tekið þátt í viðburðum sem fram fara í Viðey og eru niðurgreiddir af borginni.
„Það gerist fyrir hjólastólanotendur í hvert sinn sem Reykjavíkurborg heldur niðurgreiddan viðburð þar, auglýstan fyrir alla, en er bara fyrir suma,“ segir hann.
Hann segir alla borgarstjóra hafa boðað bót og betrun en ekkert hafi gerst. „Þolinmæði okkar sem logið hefur verið að er þrotin,“ segir hann.
„Að segja að eitthvað sé ekki hægt er bara bull og viljaleysi,“ segir Guðjón. Ein skýring borgarinnar um aðgengisleysi sé vegna flóð og fjöru.
„Síðan ég óskaði fyrst eftir aðgengi að Viðey hef ég farið til: Vestmannaeyja, Flatey á Skjálfanda þar sem vissulega gætir sjávarfalla, auk þess fór ég á Kínamúrinn og félagar mínir skoðuðu Akrapolis í Grikklandi um daginn,“ segir hann.
Þá bendir Guðjón einnig á það að tvö hjólastólamerkt salerni séu í Viðey, það vanti bara notendur þeirra á svæðið.
