Vegna mikils samdráttar í rekstri og óvissu vegna áhrifa Covid-19 heimsfaraldursins hefur Fríhöfnin ehf., dótturfélag Isavia ohf, sagt upp 62 starfsmönnum í dag.
Þetta kemur fram í tilkynningu frá félaginu.
Þar segir að frá því áhrifa faraldursins fór að gæta hér á landi hafi stöðugildum hjá fyrirtækinu fækkað um tæp 60 prósent. Á þessum tíma hefur verið gripið til ýmissa annarra hagræðingaraðgerða sem snerta öll svið Fríhafnarinnar.
„Því miður er staðan þannig að fækkun starfsfólks er óhjákvæmileg,“ segir Þorgerður Þráinsdóttir, framkvæmdastjóri Fríhafnarinnar, í tilkynningunni.
„Útlit er fyrir að ferðamenn sem koma til landsins verði afar fáir næstu misserin og erfitt að spá fyrir um hvenær fer að horfa til betri vegar. Við hjá Fríhöfninni höfum gripið til ýmissa hagræðingaraðgerða frá því að heimsfaraldurinn hófst en því miður er staðan og útlitið verra en spáð var á fyrstu stigum.“
