Lægstu verðtryggðu breytilegu vextir sem hægt er að fá vegna töku húsnæðislána eru nú 1,77 prósent. Þessir vextir standa nú til boða hjá Almenna lífeyrissjóðnum eftir að sjóðurinn lækkaði vexti sína nýverið. Lægstu óverðtryggðu vextirnir sem standa fólki til boða vegna töku húsnæðislána eru nú 4,6 prósent. Hægt er að fá þessi vaxtakjör hjá Birtu lífeyrissjóði.
Kjarninn greinir frá. Í báðum tilfellum er um lægstu vexti hvors lánaforms fyrir sig sem íslenskum lántakendum hefur nokkru sinni staðið til boða. Þannig halda vextir sem eru í boði fyrir lántakendur hér á landi áfram að lækka.
Sem kunnugt er hafa stýrivextir Seðlabanka Íslands einnig lækkað og eru nú 3,5 prósent. Hafa þeir aldrei verið lægri.
