Jón kannast ekki við að hafa hótað Unni: Segist bara hafa verið að lýsa áhyggjum sínum

Jón Gunnarsson dómsmálaráðherra hafnar því að hafa hótað Unni Berg­lind Frið­riks­dóttur, for­manni Sjálf­stæðis­félagsins í Kópa­vogi, líkt og hún heldur fram.

„Ég hafna því eindregið að hafa beitt nokkurn mann hótunum í tengslum við framangreint.“ segir ráðherrann.

Fyrr í dag sagðist Unnur hafa fengið hótanir frá „jakkafataklæddum mönnum innan flokksins“. Þar á meðal væri einn háttsettur maður, en í kjölfarið greindi hún frá því, í samtali við DV, að um Jón væri að ræða.

Jón skrifar færlsu um málið á Facebook, en þar segir hann:

„Ég átti eitt stutt símtal við formann Sjálfstæðisfélagsins í Kópavogi sunnudaginn 30. október þar sem ég benti henni á ólögmæti listanna. Ég lýsti áhyggjum mínum af því að ef ekki yrði brugðist við væri hætta á að fáir hefðu heimild til setu á landsfundi fyrir hönd Kópavogs.“