Jóhann Páll Jóhannsson, þingmaður Samfylkingarinnar, hefur bent á ákveðið ósamræmi í málflutningi Guðmundar Inga Guðbrandssonar félags- og vinnumálaráðherra. Líkt og alþjóð veit gagnrýndi ráðherrann í gær stefnu Jóns Gunnarssonar dómsmálaráðherra, en Jóhann bendir á að á mánudag hafi Guðmundur virst ánægður með útlendingastefnu ríkisstjórnarinnar.
„Á mánudaginn var Guðmundur Ingi hæstánægður með útlendingastefnu ríkisstjórnarinnar og gat hreinlega ekki setið undir gagnrýni á hana. Daginn eftir segist hann vera óánægður með vinnubrögð og nálgun ráðherrans sem fer með útlendingamál í ríkisstjórninni.“ skrifar Jóhann og vísar í frétt mbl.is, þar sem Guðmundur sagði:
„Hvers vegna er það sem Íslendingar hafa núna síðan árið 2018, og þá minni ég á þá staðreynd að Katrín Jakobsdóttir tók við sem forsætisráðherra árið 2017, í síauknum mæli tekið á móti fleira og fleira fólki, svo munar hundruðum? Það er jákvætt. En samt þarf maður að sitja undir því að hér sé verið að gera minna en aðrir eða önnur lönd.“ sagði Guðmundur þá, en í gær sagði hann þetta þegar hann var spurður út í hvort eining væri innan ríkisstjórnarinnar:
„Nei það er ekki rétt og ég gerði mjög alvarlegar athugasemdir við þá vegferð sem ráðherrann er á á ríkisstjórnarfundi í morgun.“
Því spyr Jóhann Páll nú hvort fólki lítist betur á mánudags-Guðmund eða þriðjudags-Guðmund. Og bætir við að honum þyki orð ráðherrans ódýr ef aðgerðir fylgi ekki.
„Hvort eigum við að taka mark á mánudags-Guðmundi eða þriðjudags-Guðmundi? Mér líst betur á þann seinni. En orð eru ódýr ef aðgerðir fylgja ekki.“
