Hildur Björnsdóttir, oddviti Sjálfstæðisflokksins í borginni, hefur rofið þögnina um útspil Þórdísar Lóu Þórhallsdóttur, oddvita Viðreisnar, sem skoraði í gær á Framsókn að ganga til meirihlutaviðræðna við Viðreisn, Samfylkingu og Pírata. Það gerir hún í færslu á Facebook, þar sem hún kallar meirhlutaflokkana sem sækjast eftir samstarfi með Framsókn þrjóskubandalag, sem hún segir beita klækjastjórnmálum og þráskallast við að halda völdum.
„Niðurstöður nýafstaðinna borgarstjórnarkosninga voru skýrar. Meirihlutinn féll með afgerandi hætti. Þeir flokkar sem stóðu utan sitjandi meirihluta fengu nær 60% kosningu. Kjósendur kölluðu eftir breytingum.“
„Úr kjörkössunum birtist jafnframt skýrt ákall á breytt stjórnmál. Klækjastjórnmálum úr Ráðhúsi Reykjavíkur var hafnað. Nákvæmlega sömu klækjastjórnmálum og þrjóskubandalag Samfylkingar, Viðreisnar og Pírata beitir nú við meirihlutaviðræður. Bandalagið þráskallast við að halda völdum sem kjósendur vilja ekki fela þeim lengur – með útilokunum og þvingunum. Það getur tæplega talist upptaktur að farsælu samstarfi fyrir Framsóknarflokkinn.“
Líkt og fram kemur hér að ofan sakar Hildur umrædda meirihlutaflokka um að beita þvingunum, en segir þó að enginn þurfi að undirgangast þær, enda séu margir möguleikar á borðinu við myndun meirihluta.
„Til allrar hamingju þarf enginn að undirgangast slíkar þvinganir. Það eru margir möguleikar á borðinu við myndun meirihluta. Ekki síst ef flokkarnir velja að svara ákalli kjósenda eftir málefnalegum stjórnmálum og aukinni samvinnu um mikilvæg framfaramál. Sjálfstæðisflokkurinn er reiðubúinn til samtals við alla flokka um verkefni næsta kjörtímabils. Við gengum óbundin til kosninga, boðuðum breytingar og vorum heiðarleg gagnvart okkar kjósendum.“ skrifar Hildur sem segir að lokum að nú reyni á Framsóknarflokkinn, og virðist skora á hann að fara ekki í meirihluta með Samfylkingu, Viðreisn og Pírötum.
„Nú reynir á Framsóknarflokkinn – og auðvitað alla flokka innan borgarstjórnar - að hafa hugrekkið til að svara kröfu kjósenda um breytt stjórnmál.“
