Píratar hafa forystuna í kosningabaráttunni. Þeim hefur tekist að beina athyglinni að sér. Fylgið eykst. Sumum andstæðingum þeirra gengur illa að berjast gegn Pírötum. Finna ekki aðferðina. Og tíminn týnist hratt. Vika er til kosninga.
Löngum hefur ritstjóri Morgunblaðsins amast við uppgangi Pírata. Þeir virðast nokkuð sem ritstjórinn áttar sig ekki á og alls ekki hvers vegna fólk laðast að Pírötum og hafnar því sem er ritsjóranum helst hugleikið.
Í Staksteinum Morgunblaðsins í dag segir meðal annars: „En fyrir utan farsann og markmiðið um vinstri stjórn hafa Píratar það sem sitt helsta slagorð að „endurræsa Ísland“. Fyrir nokkrum árum, þegar vinstristjórnin hafði drepið allt í dróma með samfelldum skattahækkunum í fjögur ár, hefði þetta slagorð átt vel við. En hvað á að endurræsa í dag? Á að endurræsa til að stöðva rífandi góðan hagvöxt? Á að endurræsa til að hindra áframhaldandi ríflega kaupmáttaraukningu? Eða á að endurræsa til að leyfa aukinn hugverkastuld á netinu, ýta Íslandi inn í Evrópusambandið og hækka skatta eins og síðasta vinstristjórn stóð fyrir? Halda Píratar að fólk hafi mikinn áhuga á slíkri endurræsingu? Endar endurræsingin í ræsinu?“
Samfélagið er ögn flóknara en ráða má af upptalningunni hér að ofan. Kannski á ritstjórinn að líta sér nær. Kjörfylgi Pírata kann að ráðast að því að þeir hyggjast fara gegn svo mörgum sem stjórnmálamenn fyrri tíma mótuðu. Ekki síst ritstjóri Morgunblaðsins.
