1. Stjórnmálastöðugleiki. Stefna Evrópusambandsins hefur mjög mikil áhrif á öll ríki á Norðurlöndum. Smáþjóð verður að eiga bandamenn þegar hún lendir í vanda.
2. Efnahagsstöðugleiki Stöðugt efnahagsumhverfi og trú viðskiptalanda á Íslandi eru forsendur þess að þjóðin geti byggt upp atvinnulíf sem getur selt verðmætar vörur og þjónustu úr landi. Sveiflur ógna bæði fyrirtækjum og einstaklingum.
3. Bein áhrif á framgang alþjóðamála Með inngöngu í Evrópusambandið myndu Íslendingar hafa beina aðkomu að setningu fjölmargra laga og reglugerða sem munu hafa áhrif á Íslandi um langa framtíð. Innan ESB hafa fulltrúar smáþjóða mikil áhrif.
4. Evrópusambandið er hagsmunasamband ríkja Einn aðalkosturinn við Evrópusambandið er samræming laga og reglna á ýmsum sviðum. Það er grunnurinn að frjálsum og opnum markaði. Hins vegar er Evrópusambandið samband 28 fullvalda ríkja. Danir hafa verið í Evrópusambandinu í tæplega 40 ár og halda hnarreistir fullveldi sínu.
5. Grunngildi Evrópu-sambandsins eru góð Meðal grunngilda ESB eru friður, frelsi, mannréttindi, jafnrétti og umhverfisvernd. Með aðild væru Íslendingar að leggja áherslu á að þeir vilji taka þátt í því að vernda þessi gildi, ekki bara á Íslandi heldur í allri Evrópu.
6. Styrkari samningsstaða út á við Evrópusambandið hefur gert fjölmarga alþjóðasamninga og hefur á að skipa sérfræðingum á öllum sviðum alþjóðamála. Íslendingar myndu njóta þess að vera í liði með færustu sérfræðingum heims.
7. Áhersla á lítil menningarsvæði Lítil málsvæði hafa fengið stuðning og miklum fjármunum er varið til þess að þýða bækur frá smáþjóðum yfir á önnur mál og öfugt. Nú síðast var keltneska tekin upp sem eitt af opinberum málum sambandsins
8. Íslendingar hefðu mikil áhrif Á Evrópuþinginu sitja nú rúmlega 700 þingmenn. Enginn þeirra kemur frá Íslandi. Við inngöngu fengju Íslendingar 6 menn á þingið eða um 1% þingmanna. Hér á landi yrðu rúmlega 50000 manns bakvið hvern þingmann á ESB þinginu
9. Íslendingar halda öllum sínum auðlindum og halda fullum yfirráðum yfir þeim nema að ESB er með sameiginlega fiskveiðistefnu sem við munum þurfa að taka tillit til. Meginástæðan fyrir stefnunni er að strandlengja meginlands Evrópu nær yfir fjölmörg ríki og ekkert Evrópuríki er sambærilegt við Ísland þar sem flestir fiskistofnar eru staðbundnir. Engin erlend þjóð fengi rétt til þess að veiða við Ísland við inngöngu Íslands í Evrópusambandið og fiskveiðistjórnunarkerfið yrði samkvæmt ákvörðun Íslendinga.
10. Ný tækifæri fyrir landbúnað Svíar og Finnar fengu nýja reglu um landbúnað samþykkta. Með henni má styrkja landbúnað norðan 62. breiddargráðu meira en almennt gerist innan sambandsins. Sömu reglur myndu gilda á Íslandi. Reynsla í nágrannalöndum er sú að inngangan hafi haft mjög jákvæð áhrif bæði fyrir bændur og neytendur
11. Lægri vextir. Íslendingar hafa greitt mun hærri vexti af lánum okkar en fólk í nágrannalöndum okkar. Óvissuálag og krónuálag á lán á Íslandi er nú 4- 5% og stýrivextir eru margfalt hærri en í nágrannalöndunum. Skiptikostnaður gjaldeyris er um 20 milljarðar á ári. Vaxtakostnaður okkar (almenningur, fyrirtæki og ríkið) umfram nágrannaþjóðir er áætlaður um 200 milljarðar á ári..
12. Þjóð meðal þjóða Líklegt er að smæð þjóðarinnar verði okkur styrkur ásamt með því að við erum að semja við margar hefðbundnar vinaþjóðir. Til slíkra viðræðna hlýtur þjóðin að ganga sannfærð um það að reyna að ná fram hinu besta, en jafnframt tilbúin til þess að hverfa frá þeirri leiðinni, ef niðurstaðan er ekki þolanleg.
Þessi 12 rök ættu að réttlæta það að aðildarviðræðum við ESB verði haldið áfram og þeim lokið með hagstæðasta hætti fyrir Íslendinga. Síðan verði samningurinn borinn undir þjóðina eins og lofað var fyrir síðustu kosningar. Þjóðin myndi verða að sætta sig við niðurstöðuna, hver sem hún verður.
