Það er staðarlegt heim að líta þegar ekið er út Helgafellssveitina og Stykkishólmur blasir við ökumanni og öllu hans föruneyti. Og varla verður sýnin guðdómslegri en þegar ekið er upp á hæðina þar sem gamla bókasafnið í plássinu stendur eins og sfinx í öllu sínu veldi yfir firðinum breiða og ferðamanni er litið yfir húsin í bænum sem hafa flest hver endurheimt sína fyrri reisn sakir áhuga heimamanna á varðveislu gamalla húsa. Það er meinningarbragur á þessum bæ í bestu merkingu orðsins - og þar þrífst greinilega samfélag sem er í ríkri sátt við umhverfi sitt og uppruna. Helgarferð í Hólminn er innistæðurík ávísun á dásamlega tíð, hvort heldur með gistingu á Hótel Egilsen eða Hótel Fransiskus sem bráðum verður opnað - og svo mat eins og hann verður bestur á Sjávarpakkhúsinu eða Plássinu og öðrum þeim greiðaskálum sem eru reknir af rífandi sjálfstrausti í einum fallegasta kaupstað landsins sem er aðeins í liðlega tveggja tíma ökuferð frá Reykjavík - og raunar Akureyri líka ...
Nýjast
