Hvað er núverandi ríkisstjórn að þakka og hvað ekki? Það er spurningin sem við þurfum að hafa svör við þegar ýmsar hagtölur á Íslandi eru upp á við.
Þegar styttist í kosningar verður maður þess var að stjórnarflokkarnir reyna að eyða allri gagnrýninni umræðu með því að benda á \"góðærið\" sem gerir nú vart við sig og þakka sér það.
Bættur hagur Íslendinga um þessar mundir er ekki síst atvinnulífinu að þakka. Í ferðaþjónustunni hefur orðið sprenging á síðustu 5 árum.
Sú sprenging hefur nær eytt atvinnuleysi í landinu, komið fjárfestingum á fulla ferð, aukið kaupmátt fólks og síðast ekki síst aukið til skatttekjur ríkis og sveitarfélaga, bætt gjaldeyrisstöðu þjóðarinnar og þar með styrkt krónuna.
Þessi stóraukni ferðamannastraumur er ekki ríkisstjórn Íslands að þakka, hvorki núverandi né fyrrverandi. Hann er atvinnugreininni sjálfri að þakka sem hefur kunnað að markaðssetja sig svona farsællega.
Útlendingar koma ekki til Íslands vegna atbeina Steingríms J., Bjarna Ben eða Sigurðar Inga. Þeir koma þrátt fyrir íslenska stjórnmálamenn sem hafa skort framtíðarsýn vegna uppbyggingu ferðamannastaða.
Núverandi ríkisstjórn gerir mikið úr hlutverki sínu vegna samninga við slitabú föllnu bankanna og afnáms gjaldeyrishafta. Enn eru þetta áform sem lítið hafa komið til framkvæmda en komast vonandi til framkvæmda á næstunni. Þá fyrst verður eitthvað til að státa af.
Nú eru trúlega runnir upp þeir tímar á Íslandi að kosningar munu ekki lengur vinnast á hagtölum. Sérstaklega ekki ef þær eru auðrekjanlegar beint til atvinnulífsins sjálfs en ekki aðgerða stjórnvalda.
Veislan er enn sem komið er alfarið í boði atvinnulífsins, einkum ferðaþjónustunnar.
Guðmundur Örn Jóhannsson, útgefandi.
