Ríkisstjórninni virðast ætla að verða enn mislagðari hendur í Evrópumálum en vinstri stjórninni sálugu – og er þá langt til jafnað. Sú sótti, umboðslítil, um aðild að Evrópusambandinu án þess að geta það - og þessi þykist, umboðslaus, draga þá umsókn til baka án þess að gera það.
Í Morgunblaðinu í dag er haft eftir utanríkisráðherra: „Ég hef ekki sent neitt bréf, þar sem fram kemur að einhverju sé rift eða það dregið til baka“. Í sama blaði er fjármálaráðherra og formaður Sjálfstæðisflokksins spurður hvort umsóknin hafi verið afturkölluð. Svar: „Þetta jafngildir því“.
Er til of mikils mælst að þessir tveir ráðherrar komi sér saman um hvað hafi verið gert í gær? Síðustu vikur og mánuði hafa menn skemmt sér við að hæðast að orðaleikjum Grikkja í samskiptum við Evrópusambandið. Ruglandinn í ríkisstjórn Íslands slær því öllu við.
Hvað skyldi forsætisráðherrann halda að hafi gerst í gær?
