Það er ekki einleikið hve mikla og djúpa virðingu RÚV virðist bera fyrir refsinorninni Evu Joly sem kom mjög við sögu á Íslandi fljótlega eftir hrun. Hún var þá ráðin sem sérlegur “ráðgjafi” stjórnvalda að undirlagi Ögmundar Jónassonar. Hún lagði á ráðin um það hvernig best væri að ræna bankamenn og aðra athafnamenn ærunni. Fyrir “ráðgjöf” sína þáði hún tugi milljóna króna í þóknanir úr ríkissjóði sem á þeim tíma var tæpast aflögufær.
RÚV tók sérstöku ástfóstri við þessa manneskju og hún átti ávalt greiðan aðgang að Kastljósi og Silfri Egils þar sem hún gat fjasað um meinta glæpi athafnamanna um allan heim algerlega gagnrýnislaust. Páll Magnússon var þá útvarpsstjóri og greiddi götu Evu Joly inn í alla helstu þætti RÚV. Nú er hann kominn í framboð fyrir sjálfan Sjálfstæðisflokkinn og genginn úr Samfylkingunni. Skemmtileg þversögn þarna á ferð!
Dekur RÚV við Evu Joly heldur nú áfram. Píratar fluttu refsinornina inn til fundarhalda og ekki þurfti að spyrja að undirlægjuhætti RÚV. Hún var umsvifalaust tekin í stórviðtal hjá Kastljósi þar sem Helgi Seljan skreið fyrir henni með hætti sem varla sést í fjölmiðlum hér á landi. Seljan þykir yfirleitt harður í horn að taka og hlífir viðmælendum sínum yfirleitt ekki. En þegar Eva Joly var komin á vettvang þá gerði hann ekki annað en bugta sig og beygja í virðingarskini við hana.
Eva Joly vildi verða forseti Frakklands en galt afhroð í kosningunum. Hún hlaut 1-2% atkvæða. Í aðdraganda kosninganna árið 2012 birti stórblaðið Le Monde skoðanakönnun þar sem 50% töldu hana óheiðarlega og 80% aðspurðra sögðu að Eva Joly væri vanhæf.
En RÚV telur hana nógu merkilega til að koma fram aftur og aftur og fjalla um Íslendinga með niðrandi hætti.
