Björn Leví Gunnarsson, þingmaður Pírata, vill að fólki verði bætt það upp þegar frídagar lenda á helgi, eins og gerðist um helgina þegar 1. maí var á laugardegi.
„Gleðilegan þriðja maí. Baráttudagur verkalýðsins var á laugardegi í ár og tóku því fáir eftir þessum aukafrídegi í dagatalinu,“ segir Björn í aðsendri grein í Morgunblaðinu í dag.
Hann bendir á að í ár eru bæði jóladagur og annar í jólum einnig um helgi sem þýðir að þrír frídagar eru ekki á virkum degi í ár. 17. júní er hins vegar á fimmtudegi og því fær fólk stutt frí þann dag undir lok vinnuvikunnar.
„Á Íslandi eru 14 frídagar ásamt tveimur hálfum dögum, sem eru aðfangadagur og gamlársdagur. Tveir af þessum frídögum lenda alltaf á sunnudegi og eru með meðfylgjandi frí á mánudegi til þess að laga það. Raunverulegur fjöldi frídaga er því 12 og tveir hálfir dagar. Í ár eru hins vegar níu frídagar og tveir hálfir dagar vegna þess að þrír frídagar lenda á helgi. Ýmsir frídagar á kristna dagatalinu eru bundnir við ákveðna vikudaga og fyrir vikið valda þeir minna róti í vinnuvikunni. Má þar nefna páska, en þar er annar í páskum alltaf frídagur á mánudegi. Sömu sögu er að segja af öðrum í hvítasunnu. Annar í jólum er dálítið ankannalegur í þessu samhengi því hann býður ekki upp á frídag á virkum degi ef jóladagur lendir á laugardegi, eins og gerist í ár,“ segir Björn í pistli sínum og að það eigi auðvitað að bæta fólki þetta upp.
Þá telur hann einnig að bæði gamlársdagur og aðfangadagur ættu að verða heilir frídagar í stað hálfra eins og þeir eru í dag.
„Þetta þýðir að það verða alltaf jafn margir frídagar á hverju ári en ekki breytilegt eftir árum. Jafn margir frídagar og eru í raun lögboðnir. Þetta ætti því ekki að vera flókin breyting. Þetta myndi einnig þýða að ef gamlársdagur og nýársdagur lenda á helgi þá bætist við frídagur á mánudegi og þriðjudegi ef báðir dagarnir eru um helgi,“ segir Björn í pistli sínum.
Hann segir að ef frídagur lendir á helgi eigi að færa hann á mánudag. Það sé fyrirkomulag sem þekkist, til dæmis, í Bretlandi.
Þá vill hann einnig bæta við frídögum í október og febrúar.
„Ástæðan fyrir því er langt frílaust tímabil frá verslunarmannahelgi til jóla og frá áramótum til páska. Á þeim tima er hins vegar vetrarfrí í skólum sem spilar illa saman við vinnumarkaðinn. Þessir frídagar væru þannig nokkurs konar fjölskyldufrí. Kannski væri hægt að hafa þá frídaga samhliða fyrsta vetrardeginum og jafnvel endurvekja frí á öskudegi,“ segir Björn.
Hann segir að það séu fjölmargar ástæður fyrir því að fjölga frídögunum og að stytta vinnutímann.
„Það minnsta sem við gætum hins vegar gert væri að samræma fjölda frídaga á hverju ári þannig að þeir séu ekki mismargir frá ári til árs. Þannig gætum við ekki bara fagnað baráttudegi verkalýðsins heldur einnig notið þess að fá frídag,“ segir hann að lokum.
Greinina er hægt að lesa í heild sinni í Morgunblaðinu í dag.
