Vilhjálmur Ari Arason, læknir og meðlimur í sóttvarnaráði, furðar sig á því að ráðið hafi ekki verið kallað saman eftir að kórónaveiran barst til Íslands í samtali við Morgunblaðið í dag. Hann segir að ráðið eigi einmitt að vera til staðar þegar mikil vá steðjar að.
Sóttvarnarlæknir, Þórólfur Guðnason, ítrekaði á blaðamannafundi í dag að ráðið væri aðeins ráðgefandi fyrir sóttvarnarlækni og stutt væri síðan það fundaði síðast. Hann undraðist þessi ummæli Vilhjálms Ara.
Sóttvarnaráð er skipað sjö fulltrúum auk sóttvarnarlæknis, sem er ritari þess og boðar það saman. Vilhjálmur Ari hefur nú hvatt til þess að ráðið verði kallað saman vegna kórónaveirufaraldursins.
„Þetta ráð er fyrst og fremst til ráðgjafar fyrir ráðherra og sóttvarnarlækni og á að vera til staðar ef mikil vá steðjar að. Við héldum fund 14. febrúar sem var mjög góður og þá fékk sóttvarnarlæknir fullan stuðning á þeim aðgerðum sem planaðar voru,“ segir hann.
„Eins var áréttað að meta þyrfti stöðuna eftir því hvernig hlutirnir þróuðust. Síðan hefur verið keyrt á þessu aðgerðastigi. Ég held að það séu flestir sammála um að þetta hefur lukkast vel en ég held engu að síður að samráð sé af hinu góða.“
„Manni finnst synd að fyrst maður situr í þessu ráði skuli maður ekki vera nýttur. Ekki það endilega að við séum með betri lausnir en það er þá alla vega búið að ræða málin,“ segir hann svo og vill að öll sjónarmið fái að koma fram á fundinum.
Hann segist vilja ræða sérstaklega hvort rétt sé að halda leikskóla- og skólastarfi áfram. „Það eru ný vísindi fyrir mér ef faraldur eins og þessi dreifist ekki mest meðal barna.“ Einnig vill hann ræða hugmyndir um að loka ákveðnum landshlutum í faraldrinum: . „Ég sem heimilislæknir er hugsi um stöðuna víða úti á landi þar sem innviðir eru ekki eins traustir. Ég hefði viljað að þessu væri gefinn betri gaumur.“
