Fjölmiðlamaðurinn Sölvi Tryggvason ræðir á opinskáan hátt um það þegar honum var sagt upp störfum hjá Stöð 2 árið 2008 í nýjum þætti af hlaðvarpinu Skoðanabræðrum. Þáttinn má hlusta á hér að neðan.
Hann segist telja að uppsögnin hafi tengst því þegar hann hafi byrjað að „pönkast“ í lífeyrissjóðum. Það hafi verið þá sem hann hafi misst sakleysi sitt sem fjölmiðlamaður.
„Tuttugasta desember held ég að það hafi verið sem ég tek viðtal við Geir H. Haarde og spyr hann út í lífeyrissjóðina. Þá er ég líka búinn að vera gera alls konar aðra hluti, ég er búinn að vera svolítið óþekkur, og ég áttaði mig ekki á því á þeim tíma að það væru kannski umræður um mig í stjórninni. Eitthvað um að þetta væri bara ekki alveg í lagi, afþví ég er bara fréttamaður sem held að ég eigi að segja sannleikann,“ segir Sölvi.
Hann hafi svo skömmu eftir viðtalið verið látinn fara. Bendir Sölvi á að Ari Edwald, núverandi forstjóri Mjólkursamsölunnar, sem þá hafi stýrt 365, hafi meðal annars setið í stjórnum lífeyrissjóða.
Sölvi segist þá hafa farið í sitt solo mission. Hann hafi hitt ýmsa einstaklinga til að komast til botns í málinu, þar sem hann hafi séð fram á að starfa áfram í fjölmiðlum. „Ég hitti Jón Ásgeir, Björgólf Thor, Davíð Oddsson, Ingibjörgu Sólrúnu og Geir H. Haarde, og það voru allir til í að hitta mig.“
Sölvi lýsir því hvernig Geir hafi sagt honum að Arnar Sigurmundsson, þáverandi formaður Landssamtaka lífeyrissjóðanna hafi hringt í hann og spurt sérstaklega hvernig „þessi strákur“ hafi haft þesar upplýsingar.
„Þegar yfirmaður Landssamtaka lífeyrissjóða hringir í forsætisráðherra korteri eftir að eitthvað viðtal er búið þá ertu farinn að hitta á einhverja skrítna strengi, þannig að ég held að ég sé ekkert í einhverjum svakalegum samsæriskenningum þegar ég segi að það var þægilegt að losna við mig,“ sagði Sölvi.
