Svava Guðrún Helgadóttir, ráðgjafi í Bjarkarhlíð og meistaranemi í heilbrigðisvísindum með áherslu á sálræn áföll og ofbeldi, fjallar um ofbeldi og áhrif þess í grein sem birtist í Fréttablaðinu í dag.
Þar snertir hún meðal annars á áhrifum ofbeldis á jólin.
„Nú þegar hátíð gengur í garð er eðlilegt að upplifa sorg og hryggð. Syrgja hátíðisdaga sem litast hafa af gjörðum gerandans. Rifja upp gleðistundir sem ekki urðu og jól þar sem erfitt var að mæta vonum og væntingum barnanna sökum ofbeldis og ómannlegs álags.“ skrifar Svava sem segir að þá sé mikilvægt að sýna sjálfum sér samkennd.
„Ofbeldi er samfélagsmein sem hvergi á að þrífast og til þess að stemma stigu við því verðum við að taka höndum saman og berjast gegn því. Við verðum að berjast gegn þögguninni og viðurkenna reynslu og tilfinningar þolenda, þar er sorgin stór og viðamikill þáttur. Ferli sem tekur tíma en leiðir vonandi af sér sátt.“ segir Svava sem endar grein sína á þessum orðum:
„Allir hafa rétt á sinni sorg. Hún er mikilvægur partur af bata hvers manns og aðlögun að nýju lífi. Engin leið er úr sorginni nema í gegnum hana.“
Hægt er að lesa grein Svövu í heild sinni hér.
