Fjölmargar konur hafa stutt við bakið á íþróttafréttakonunni Eddu Sif Pálsdóttur eftir hún greindi frá alvarlegri líkamsárás sem hún varð fyrir árið 2012 inn á klósetti á Grand Hótel í Vikunni.
Þetta var í fyrsta skipti sem Edda ræddi árásina opinberlega. Edda Sif kærði fjölmiðlamanninn Hjört Hjartarsson árið 2012, en málið fór ekki fyrir dóm þar sem þau náðu samkomulagi. Árásin átti sér stað eftir kjörið á íþróttamanni ársins í janúar 2012 þar sem þau bæði voru að vinna. Edda Sif segir að mörg vitni hafi orðið að hluta atburðarásarinnar, annars hefði hún mögulega aldrei sagt frá því sem gerðist.
Edda sagði í viðtalinu að atburðarrásin sæti enn í henni og hún hafi þurft að leita til Bjarkarhlíðar sex árum eftir atvikið. „Ég tikkaði í öll boxin,“ segir Edda. „Ég lét þetta yfir mig ganga án þess að segja mína hlið og hef gert síðan en það gengur kannski ekki upp að þegja bara og ætlast á sama tíma til að fólk viti og skilji. Og ég væri örugglega ekki að tala um þetta núna nema af því að það er fullt af fólki búið að stíga fram með sína reynslu og ég vona að tíðarandinn sé þess vegna aðeins annar en fyrir áratug,“ segir Edda Sif í Vikunni.
Þórhildur Þorkelsdóttir fyrrum blaðamaður sendir Eddu Sif stuðningskveðjur á Twitter. „Ég er svo stolt af vinkonu minni sem er mesti nagli sem ég þekki. Umræðan um þetta mál á sínum tíma var galin og náði aldrei utan um þetta ógeðslega og lífshættulega ofbeldi sem hún varð fyrir - og þetta var hvorki í fyrsta né síðasta skipti sem hann beitti því,“ skrifar Þórhildur.
Gyða Guðmundsdóttir tekur í sama streng og segir: „Elsku hugrakka, sterka, klára og góða Edda Sif. Ég stend með þér og veit að við erum ótalmörg em trúum þér og styðjum þig. Takk fyrir að vera nákvæmlega eins og þú ert.
Íþróttafréttakonan og Gettu Betur spyrilinn Kristjana Arnars deilir færslu Gyðu og segir: „Tek undir hvert orð.“
