Mikill styr hefur staðið um Sólveigu Önnu Jónsdóttur, fráfarandi formann verkalýðsfélagsins Eflingar, eftir að hún tilkynnti á sunnudagskvöld að hún léti af störfum. Hún hefur ekki svarað ítrekuðum fyrirspurnum fjölmiðla vegna málsins en tjáir sig um það í færslu á Facebook.
Sjá frétt: Beiðni um vinnufrið hafnað afdráttarlaust af starfsfólki
Hún segir þar að hún hafi aldrei fengið vinnufrið á skrifstofu Eflingar til að sinna þeim verkefnum sem hún var kjörin til að sinna.
„Verkefni mitt var einfaldlega ekki tekið alvarlega,“ segir Sólveig Anna. Hún nefnir sem dæmi um erfiðar starfsaðstæður að því hafi verið illa tekið að hún borðaði hádegismat sinni inni á skrifstofu.
„Þegar ég frétti af því að þetta væri illa séð og tekið sem enn ein sönnun á því hve ömurleg ég væri brást ég strax við og reyndi að fremja þennan glæp aldrei aftur. Þetta er aðeins eitt dæmi um það skilningsleysi og virðingarleysi sem ég mætti,“ segir hún.
Hún segir að hún hafi í fullri einlægni beðið starfsfólk um að veita sér vinnufrið en þeirri beiðni verið hafnað. „Þeirri beiðni var afdráttarlaust hafnað; herferðin inná vinnustaðnum, byggð á ofstæki og andúð í minn garð, skyldi halda áfram, með engan endi í sjónmáli. Því fór sem fór,“ segir Sólveig Anna.
