Sólveig Anna Jónsdóttir, formaður Eflingar og frambjóðandi Sósíalistaflokksins, er harðorð í garð Diljár Mistar Einarsdóttur, frambjóðanda Sjálfstæðisflokksins, og segir að henni standi „nákvæmlega sama um þær raunverulegu verka og láglaunakonur sem eiga ekki krónu með gati.“
Diljá var gestur í Silfrinu á RÚV í dag og Sólveig Anna virðist ekki mjög hrifin af því sem hún sagði þar en til umræðu var stórskattur á þau sem eiga hundruð milljónir í hreina eign og hvernig framkvæmdin var síðast þegar það var reynt. Diljá Mist hafði orð á því hvernig það gæti hentað illa þegar fólk ætti hreina eign en gæti ekki staðið skil á sköttum og öðrum tengdum gjöldum, og þá sérstaklega ekkjur.
„Henni stendur nákvæmlega á sama um þá staðreynd að fjöldi verkakvenna hefur ekki efni á nauðsynlegri heilbrigðisþjónustu. Henni stendur nákvæmlega á sama um að stór hópur verkakvenna sé fastur á leigumarkaði og þurfi að horfa á eftir ráðstöfunartekjum sínum í vasa þeirra sem tilheyra eignastéttinni. Henni er nákvæmlega sama um þær konur sem urðu undir í Covid-kreppunni og þurftu að leita á náðir hjálparsamtaka til að fá mat fyrir sig og afkvæmi sín á meðan þær sukku enn dýpra í fátæktar-fenið,“ segir Sólveig Anna.
Hún segir að henni sé sama um verkakonur og að henni þyki betra að „delera og bulla um einhverjar ekkjur sem, ef þær á annað borð eru til, tilheyra ríkasta og dekraðasta hluta þeirra sem byggja þetta land, og afvegaleiða með því lýðræðislega, pólitíska umræðu.“
„Diljá Mist er ekkert annað en ómerkilegur pólitískur loddari. Ég vona af öllu hjarta að hún og þessi ömurlegi arðráns og spillingarklúbbur sem hún tilheyrir, Sjálfstæðisflokkurinn, missi þau eitruðu völd sem þau hafa í samfélaginu okkar,“ segir Sólveig Anna.
