Sólveig Anna Jónsdóttir, formaður Eflingar segir að hópuppsögnin sem fór fram í Eflingu á síðasta ári sé lögmæt og að hún muni standa. Í dag birti Félagsdómur ákvörðun sína, þar sem kom meðal annars fram að uppsögn félagsins á trúnaðarmanninum Gabríel Benjamin hafi verið ólögmæt.
Í stöðuuppfærslu á Facebook ber Sólveig Gabríel söguna ekki vel.
„Þessi fáránlegi einstaklingur sendi mönnum útí bæ persónuleg skilaboð um að ég væri að ljúga þegar ég sagði frá alvarlegri og grófri ofbeldishótun sem ég varð fyrir frá samstarfsmanni hans. Allt sem ég sagði var „pjúra lygi“ samkvæmt honum. Hann skrifaði snarbilaða níðgrein um mig síðasta vetur, uppfulla af grófum persónuárásum og lygum,“ segir Sólveig Anna.
Sólveig segir að Gabríel hafi ítrekað sagt ósatt í fjölmiðlum um starfsemi skrifstofu Eflingar til að skapa hræðslu hjá félagsfólki.
„Meðal annars laug hann því að við gætum ekki greitt út sjúkradagpeninga til fólks, gætum ekki tryggt ein mikilvægustu réttindi félagsfólks. Hann sótti svo ekki einu sinni um starf aftur hjá félaginu, eins og allt starfsfólk var hvatt til að gera. Hversvegna? Jú, af því að hann trúði því að ég ætti að hringja í hann og bjóða honum starfið (eða bjóða honum á fund til að horfa í augun á honum) sökum stórkostlegrar sérstöðu hans í mannlegri tilveru!,“ segir Sólveig.
Hún segir að Félagsdómur hafi tekið undir „trylltar“ ranghugmyndir Gabríels, að hann einn hafi ætlað frelsa félagsmenn Eflingar undan yfirráðum Sólveigar.
„Og hann kallar mig einræðisherra fyrir að hafa ekki talið rétt að krýna hann sérstakann skrifstofuprins Eflingar. Þetta er svo gjörsamlega fáránlegt að ég get ekki annað en hlegið,“ segir Sólveig.
Hægt er að lesa meira hér.
