Sjó­maður frá Dal­vík skaut á strand­gæsluna: „Stóð þarna víga­legur eins og Rambó með hagla­byssuna“

Gestur Sjóarans á Mann­lífsþessa vikuna er Hús­víkingurinn Ei­ríkur Sigurðs­son, skip­stjóri á Reval Viking.

Ei­ríkur var Há­gangi þegar norsk frei­gáta skaut á skipið þegar það var við veiðar á Sval­barða­svæðinu.

Í sam­tali við Sjóarann lýsir Ei­ríkur á­tökunum en skipið var skráð í Mið-Ameríku­ríkinu Belís sem á hlut að Sval­barða­sátt­málanum.

Norð­menn fara með stjórn á Sval­barða­svæðinu og vildu ekki sjá þessi er­lendu skip þarna en Ei­ríkur og hans menn vildu ekki láta þá komast upp með að bola sér í burtu.

Norð­menn gripu í vopn úr þorska­stríðinu og ætluðu sér að klippa úr þeim trollin.

,,Það tókst nú ekkert hjá þeim, þetta voru svo miklir klaufar, kunnu ekkert á þetta en svo til að stríða þeim þá slökuðum við bara hlerunum út en engu trolli, það voru bara grandarar á milli hleranna. Þeir fóru fyrir aftan okkur og voru að reyna að klippa því þeir héldu náttúru­lega að við værum bara á togi en svo endaði með því að við nenntum þessu ekki og hífðum trollið upp. Það brutust alltaf út svaka­leg fagnaðar­læti um borð í frei­gátunum því þeir sá náttúru­lega að það komu engin troll! En trollin voru allan tímann uppi á dekki bara,“ segir Ei­ríkur í sam­tali við Sjóarann.

Þegar þeir voru við veiðar í Leir­dýpinu skammt undan land­helgi Noregs kom ein frei­gátan siglandi og þeir á­kváðu að hífa í hvelli. Þegar hlerarnir voru komnir upp var fullt af fiski í trollinu sem þá flaut fyrir aftan skipið. Frei­gátan sendi þá út létt­bátinn með smærri gerð af klippum og ætluðu að reyna að klippa á pokann og rífa hann í tætlur.

Þegar létt­batinn var að bera að garði leist Ei­ríki ekkert á blikuna, kallaði á kallana niðri á dekki að taka til spúls­lönguna og reyna að spúla þau í burtu. Báturinn hörfaði um stundar­sakir en sneri svo aftur. Þá tók 150 kílóa, tveggja metra hár stýri­maður Ei­ríks, Anton Ingva­son frá Dal­vík, sig til og óð aftur í skut með hagla­byssu. ,,Hann stóð þarna víga­legur eins og Rambó með hagla­byssuna og reiknaði með að það myndi duga; hann ætlaði náttúru­lega aldrei að skjóta nokkurn mann!“

,,Hann ætlaði bara að hræða þá. Það dugði samt ekki neitt þannig hann skaut einu skoti, helvítis maðurinn! Og það var nú ekki mjög vinsælt.“

Hægt er að horfa á við­talið í heild sinnihér.